Atualità
Cater ntervënc a purtoies te chemuns ladins azetei dala cumiscion provinziela
USP – Pra purtoies dai schi sun Secëda, Plan de Gralba, Piz Sella y a Santa Crëusc puderal unì fat lëures de cumedura. La Segonda cumiscion provinziela per la scunanza dla cuntreda à te si ultima senteda azetà i proiec mandei ite se damandan nce vel cundizion.
Sun Piz Sella possel unì valivà l purtoi “Comici”. La sozietà “Piz de Sella” à mandà ite n proiet per adaté l purtoi a na maniera che l devënta plu segur y che l sibe de bujën de manco nëif artifiziela. Per chësc ntervënt iel unì proietà de spusté 3.400 metri cubich de material. La cumiscion provinziela à azetà l proiet a cundizion che l material vënie me spustà ulache passa l purtoi y che l vënie mantenì la strutura dl raion. Per pudëi fé i lëures muessel unì segurà na cauzion de 5.000 euro.
La medema sozietà de Piz Sella à nce proietà de slargë l purtoi Falk danter Piz Setëur y Plan de Gralba. La Segonda cumiscion provinziela per la scunanza dla cuntreda à azetà l proiet a cundizion che l vënie me laurà ju per l purtoi sciche se à damandà la cumiscion per l frabiché dl Chemun de Sëlva. Per chësc ntervënt iel udù dant de spusté 1.500 metri cubich de material. L bënsté dla cumiscion ie lià a na cauzion de 7.000 euro.
La sozietà de Secëda à proietà de miuré l purtoi de viers de Marëufer che ie sun la pert dl Chemun de S.Crestina. Tlo ulëssen slargë n toch che ie me cin metri lerch, a na larghëza de 8,5 metri. Mpede slargë de 3,5 metri à la Cumiscion per la cuntreda me azetà che l vënie slargià de 2 metri, tulan ite sibe la pert dessëura che dessot y schivan costruzions artifizieles. L rone segurà cun trames possa unì fat su nchin a cin metri de autëza. Per i lëures sun Secëda iel unì damandà na cauzion de 15.000 euro.
Tl raion dl Chemun de Badia à la sozietà de Santa Crëusc proietà de miuré y slargë l purtoi “Pedraces”. Aldò dl architet Karl Dietl, che à menà la senteda dla cumiscion, se tratel de pitli ntervënc sciche l slargë de un n meter de viers dl bosch per valivé l purtoi a na maniera che l devënta plu segur.
as
