Atualità
A La Val regulamentëia turism y paurs chi che va cun la roda – Assessur Berger contënt
USP - A la Val él gnü regolamentè i trus da munt por chi che va cun la roda che é sön le grunt de privać, y plü avisa sön la basa de n’acordanza danter la Lia di Paurs y l’Assoziaziun Turistica. "Al me fej dër plajëi che an à adorè nosta acordanza, ajache ara garantësc la segurëza legala de trames les perts", insciö l’assessur Hans Berger, che spera che La Val devëntes n model.
L’acordanza, che é gnüda laurada fora sön scomenciadia dl assessur Berger bele l’ann passè cun la Lia di Paurs y l’Assoziaziun provinziala dles lies turistiches (LTS), dess pité na soluziun por na situaziun che n’é nia tlera a livel legal y che contëgn dantadöt risć de garanzia por i patruns dl grunt. "I paurs ne podô mai ester sigüsc da nia gnì cherdà a respogne di dagns tl caje de inzidënć sön i trus da munt por chi che va cun la roda fora por so grunt", insciö Berger. Inće la manutenziun, le mëte sö les tofles y le retlam de chisc trus n’ê nia regolamentè.
Düć chisc seturs vëgn metüs al sigü cun l’acordanza danter i paurs y le turism. A La Val se crüzia la Lia di Paurs dla manutenziun regolara di trus, l’Assoziaziun Turistica cofinanziëia chisc laûrs y surantol i atri dovëis, y po porchël fà retlam aladô di trus da munt. "Chësc ejëmpl mostra che ara va da ciafè na soluziun a na manira efiziënta, sce l’agricoltöra y le turism stà dala medema pert", insciö l’assessur, che à la competënza te trami i seturs tla Junta provinziala. Berger sotrissëia che la colaboraziun di seturs à suzès canche trames les perts se respetëia: "Sce al é le respet y an tëgn cunt di dërć y di bojëgns de düć, vëgnel a s’al dè colaboraziuns sinzieres y che döra."
"I sun contënt che nostes diretives portes i pröms früć, y i speri sambëgn che inće d’atri raiuns ti vais do al ejëmpl d’La Val, olache les diretives é gnüdes adatades a na manira otimala ala situaziun dl post", insciö Berger. Tramesdöes les perts é contëntes dl’acordanza. Arthur Frenes, le presidënt dl’Assoziaziun Turistica, s’la conforta dantadöt al’oferta por chi che s’anüza de chisc trus da munt. Le surastant dla Lia di Paurs Federico Rubatscher sotrissëia che i paurs, che laôra por la manutenziun di trus, ciafarà tl dagnì vouchers dl INPS (y gnarà assigurà), che vëgn finanzià dal turism.
usp
