Atualità
Studi dl permafrost Sun Mëisules à na gran mpurtanza
USP – Pra l lech dl Dragon, sun l banch de Mëisules à geologs dla Provinzia metù man de furé per studië l permafrost. Do la prima ena de lëures ie l assessëur ai lëures publics, Florian Mussner stat sun l post per udëi co che va inant i lëures per studië l permafrost tl’Elpes.
Per ruvé pra la luegia ulache l vën furà muesse jì dal jëuf de Frea doi ëura a pe per ruvé japé dl Sas dai Ciamorces. Propi dlongia l Lech dl Dragon iel unì purtà su la mascins da furé. Per via dl’autëza y dla cundizions dl tëmp ne ie i lëures nia scëmpli da purté inant. L ie n lëur drët particuler, chël che la Provinzia de Bulsan lascia fé tres l Assessorat ai Lëures publics.
Chisc studi dl permafrost ie aldò dl assessëur Florian Mussner de gran mpurtanza ajache i nes reverda duc: “I resultac di studi mostra su cie che ie stat, nes ie de utl per capì cie che suzed y per prugramé ntervënc dl daunì”. L vën analisà l permafrost te Schnals, Ulten, sun l Ortler y sun l Sella.
I lëures vën menei dal pert dl Ufize provinziel de geologia tl cheder de n proiet interreg IV Talia-Austria „Permaqua“ per nrescì la cunseguënzes sun l’ega da bever y l’ecologia dl’eghes al’auta (www.permaqua.eu).
Sun l puron de dlacia, sëura Murfrëit vëniel furà te doi lueges per tò ora tapli de material. Chisc vën fai ite y metui al frësc per pudëi pona, canche i lëures sarà stluc ju, i mené tl università de Dispruch. Tlo unirai analisei do cuntenuc chimics y per nrescì tan vedla che ie la dlacia. Ti bujes furei ora uniral metù ite njinies per museré la temperatura ntan i proscimi ani y per museré spustamënc dla dlacia.
as
Galaria dales fotografies
Prim resultac di studi dla Dolomites y dl permafrost sun Mëisules
L assessëur Mussner spiega la rejon di lëures per studië l permafrost
- Scarica il file audio 568 kb
