Atualità
Prutezion da levines sun Ciampinëi y lech per Pralongià
USP – Sun Ciampinëi possel unì fat prutezions da levines y per la sozietà de Pralongià de Corvara n lech sot a tiera da fé nëif: chësc ie unì dat pro dala Cumiscion provinziela per la scunanza dla cuntreda.
La sozietà dla furnadoia Saslong à proietà pruvedimënc contra la levines sun Ciampinëi, che ie tl raion de Sëlva. La se trata de mëter su trëi rëies lerges 1,3 nchin 1,8 metri cun n’autëza de 3,5 metri. La Cumiscion provinziela per la scunanza dla cuntreda à azetà chisc pruvedimënc a cundizion de na cauzion de 10.000 euro. I lëures possa unì fai cun verdia dl Servisc de forestela.
Per l raion dai schì Pralongià a Corvara à la sozietà di mplanc proietà n lech de 5.000 metri cubich. La Cumiscion per la scunanza dla cuntreda à azetà l lech sot a tiera se damandan che l raion sëuravia vënie fat crëscer ite cun plantes tipiches tl post. Per pudëi fé i lëures muessel unì segurà na cauzion de 10.000 euro.
La cumiscion dla Provinzia à nce azetà che l vënie valivà y fat crëscer ite doi stredes sun Mont Sëuc. Chëstes fova unides fates per frabiché la stazions a val di lifc Panorama y Bulacia, y mesura feter 600 metri de lunghëza. Tl daunì puderal me plu resté n troi de 1,5 metri de larghëza.
N proiet de varianta per ngrandì la cësa dl Jëuf de Sela ne ie alincontra nia unì dat pro dala Cumiscion per la scunanza dla cuntreda. “Son dla minonga che l dëssa unì valutà l proiet ntier” à dit l architet Arno Gamper che à menà l’ultima senteda dla cumiscion provinziela.
as
