Atualità
Prioriteies de Durnwalder per la populazion ladina
USP – L mpëni per i chemuns ladins de sëuramont, la tratatives per l ampliamënt dla RAI Ladina, na regulamentazion per i jëufs dla Dolomites y l Fondo Brancher ie stai i argumënc prinzipei tl’ancunteda dl presidënt dla Provinzia Luis Durnwalder cun jurnalisc' ladins ntan si cunferënza stampa da instà, (NCUEI) ai 16 de agost a Falzes.
I trëi chemuns de sëuramont y la Provinzia de Bulsan ie liei da storia che ie à deberieda. "L me fajëssa perchël plajëi sce i trëi chemuns dla provinzia de Belun unissa a fé pert dl Südtirol" à dit Luis Durnwalder a Falzes. Do che l fova unì fat l referendum per ruvé pra l Südtirol ne ie la pruzedures nia plu jites inant. "Da permò ei metù a cuer a nosc parlamenters che i se debe da fé per purté inant la cuestion" à dit l presidënt. L fossa udù dant che l Stat damande na minonga ala Provinzies, ma chësc ne ie mo mei suzedù. Sun la minonga dla Region ie Durnwalder segur che la fossa a una per l'agregazion di trëi chemuns de sëuramont.
La tratatives per n ampliamënt dla RAI Ladina n cont de tëmp de trasmiscion y strutura ie inò daviertes. "Fan bele ruvei a bon pont, à dit Durnwalder, ma pona à l Minister dla Finanzes fermà dut". De plu tëmp de trasmiscion y personal per la RAI de Bulsan unissa a custé 20 milion de Euro. "Sce la Provinzia dà 20 milion per la RAI de Bulsan o sce l ne suzed nia, ruva i 20 milion a uni maniera al Stat. Per chësta rejon ne ti cunvënt al Stat nia a dé pro nosta pruposta per la RAI y nes dé nsci cumpetënzes nueves" à dit Luis Durnwalder. Mo dan la feries da instà à l presidënt dla Provinzia mandà na lëtra al presidënt dl Stat Giorgio Napolitano prian bel de na si ntervenzion per ruvé inant cun la tratatives.
Na bona regulamentazion di jëufs dla Dolomites ie aldò de Durnwalder me realistica cun la trëi provinzies a una. Autramënter pensun bele a mëter a jì la soluzion dl daz, me per la stredes di jëufs sun raion dl Südtirol. "I scioldi che unissa trai ite cun l daz restëssa a uni maniera ai chemuns, per nvestizions de segurëza, lueges dai auti y trasport publich" à dit Durnwalder. L'alternativa de saré i jëufs a ëures, purtëssa aldò dl presidënt dla Provinzia me cunfujion. Acioche la vede inant cun na regulamentazion di jëuf, iel aldò de Durnwalder debujën de na posizion tlera dla populazion. Nce dala Lia di Chemuns Ladins se aspieta l presidënt na tëuta de posizion. La situazion atuela dla provinzia de Belun, aministreda da n cumisser ne ie per Durnwalder nia l problem prinzipel: "n cajo possen nce traté cun l cumisser".
„Fajeron recurs ala maniera de gestion dl Fondo Brancher" à Durnwalder cunedì a Falzes. Tl'Acurdanza de Milan iel unì fat ora che la provinzies de Bulsan y Trënt, debe tramedoves 40 milion de euro per pruvedimënc acioche la sëides cun i chemuns ujins devënte plu mujeles. Dal Stat fovel unì metù dant na gestion a paiamënt che mëter tramedoi 40 milion te un n poz. Chësc ne vën nia azetà a Bulsan acioche l Südtirol uël spartì si pert sun 7 chemuns ujins, ntant che Trënt nen à 42 da spartì su. „Tenion dur che l ne vënie nia dut metù tl medemo poz" à detlarà Durnwalder. N cont di proscimi vares da pert dla Jonta provinziela à Durnwalder dit che da pert de Trënt y dl Stat ulëssen śën dé ora i scioldi, perchël messerai nce tenì cont de Bulsan.
La gestion zentrela fova bele n iede unì tëuta ju, ma sun prescion politiches iela pona inò unida metuda su.
Fotos dla cunferënza stampa da instà
sun la plata facebook "Jonta dla Provinzia de Bulsan"
as
Galaria dales fotografies
Durnwalder anconta i media a Falzes
Durnwalder: obietives per la populazion ladina
- Scarica il file audio 1038 kb
