Atualità

Politica | 16.08.2012 | 17:17

Durnwalder a Falzes: pruvedimënc per l autonn

USP – La Provinzia messerà d’autonn sparanië de plu per judé pea a ressané la finanzes dl Stat talian: pra la cunferënza stampa da instà a Falzes à l presidënt dla Provinzia Luis Durnwalder, (NCUEI) ai 16 de agost, prejentà la situazion atuela y pruvedimënc nueves.

Sce la va do la pertendudes dl Guviern messëssa la Provinzia smëndrì si custimënc de mo autri 350 milion. „Sce union sfurzei a fermé l muvimënt de cassa, ne possa la Provinzia dala fin de utober nia plu fé paiamënc" à dit Durnwalder a Falzes. De cunseguënza messëssa la Provinzia scumencé a adurvé scioldi dan n auter ann.
Nchinamò se à l Guviern talian damandà 1.300 milion de euro dala Provinzia de Bulsan per judé a ressané la finanzes dl Stat. Tres l'Acurdanza de Milan fovel bele unì segurà 500 milion, śën muessa la Provinzia cialé co che la abina mo adum 800 milion da mandé a Roma.

Mpede n bilanz provinziel de 5,1 miliardes de euro, vëija Durnwalder danora che per l 2013 ruveran me pu a 4,9 miliardes, y chësc uel di che l ie debujën de sparanië mo de plu. La Jonta provinziela se mpënia daniëura de pudëi marciadé cun Roma sun la soma da paië, ma uel nstës pudëi mpartì ulà sparanië. Durnwalder à cunedì che Enrico Bondi, nciarià dal Guviern per l spending review, à damandà de unì a Bulsan per tratatives. L presidënt di Ministri Mario Monti ova bele detlarà che chësc Guviern tecnich ne dajerà nia cumpetënzes nueves al Südtirol ajache si ncëria ie chëla de ressané l debit dl Stat.

„Cie che ne pudon nia azeté ie che l Stat se mescëida daniëura ite te nosta cumpetënzes sciche la cumpëida de liec di spedei, la cunzescions dal'ega o la njontes sun la chëutes" à dit Durnwalder. Uni iede che l Guviern ne respetea nia l'Autonomia fej la Provinzia recurs dan la suneria costituzionela, ma nce sce la giata rejon, passel uni iede feter mez ann. Durnwalder à dit che n cialerà mo inant de pudëi marciadé cun Roma cun l fin de ruvé a na soma y de pudëi pona nstës tò la dezijion ulà sparanië. Sce l ne unirà mo for nia respetà l'Autonomia jiran inò dan suneria costituzionela. Al'Austria fajeran al savëi la situazion n cont dl'Autonomia, nia tan la cuestion finanziera ajache chël ie velch che reverda truep raions dl'Europa. Sce l vën a se l dé tratatives danter Austria y Talia per l'Autonomia dl Südtirol y nianca chëstes ne porta a n resultat positif, cialeran che la cuestion ruve inant ala istituzions nternaziuneles sciche l UNO.

A livel provinziel uelen mo n iede smendrì i custimënc de 20%. Durnwalder à rujenà de smendrì i paiamënc di politics a na maniera che a livel de cunselieres provinziei ruva Bulsan japé dla tlassifiches naziuneles. Nsci dëssel nce unì smendrì i fonds de reprejentanza di assessëures provinziei. N cont di auti de servisc à l presidënt dit de ulëi ciafië cun manco auti. Tlo ne dëssa nia plu uni assessëur avëi n auto de servisc per sé, ma me canche l vën adurvà.

Durnwalder à metù a cuer de udëi la crisa sciche chance. A livel economich vala mo for suvier y l standard de vita ie mo for aut. Nsci iela aldò dl presidënt nce tl turism, ulache dant o do arjonjen mefun na sëida, ma cun 6 milion de turisć ne possen nia di che la ne vede nia bën tl Südtirol.

Cun i programs nueves che n uel mëter a jì uelen tenì cont dla pitla mprejes, che vënie sustenì l ressanamënt de vedla cëses y che vënie nuzedes la casermes uetes.

Fotos dla cunferënza stampa da instà
sun la plata facebook “Jonta dla Provinzia de Bulsan”