Atualità
Trasport di sculeies, borses de studi y partezipazion al aereoport de Verona
USP – Ta senteda ntan l tëmp de pausa da instà à la Jonta provinziela (NCUEI) ai 17 de agost dat pro na lingia de delibres de nteres generel. L trasport di sculeies, la borses de studi y la partezipazion al aereoport de Verona ie unic prejentei tla cunferënza stampa meneda dal vizepresidënt dla Provinzia dlongia i argumënc de majer nteres (cëla articuli a pert).
Per l proscimo ann de scola à la Jonta inò segurà l servisc particuler de trasport di sculeies. De ndut possa 30.000 sculeies dl Südtirol se nuzé dl trasport publich per jì a scola. Per 5.000 sculeies uniral d'autonn inò pità l servisc particuler de trasport da raions desman, ulache l ne passa nia l trasport de linea. I assessëures à dat pro la ncëria al cunsorz de trasport KSM adatan l custimënt al index de nflazion de 3,2%, che fej ora na ncëria de 7,2 milion de euro. L servisc particuler de trasport fej aldò dl vizepresidënt Berger ora n custimënt de 10.000 euro ndut al ann.
Per l proscimo ann academich paia la Provinzia inò borses de studi. I assessëures provinziei à dat pro n custimënt de 2,5 milion de euro de sustëni al studi. L prim terminn per fé dumanda de sustëni finanziel per studië toma ala fin de jené 2013.
La Provinzia de Bulsan fej pert dla sozietà dl aeroport Valerio Catullo de Verona. Davia che chësta sozietà à dificulteies vëniel śën aumentà l capital de 15 milion de euro. La Jonta provinziela à fat ora de nia fé pea chësc aumënt de capital. A chësta maniera se smëndrirà la relazion dla pert provinziela dal 6,7 al 6,3 percënt.
as
