Politica | 27.08.2012 | 14:16

Prupostes de lege dla Jonta provinziela per chëst ann

USP – l sustëni per ressanamënc energetics, al’economia y l’espurtazion ie i ciamps prinzipei che la Jonta provinziela se à tëut dant nchin ala fin dl ann. L presidënt Durnwalder à (NCUEI) ai 27 de agost prejentà i argumënc dla prupostes de lege che la Jonta provinziela uel purté inant ntan chësc ann.

La lege plu mpurtanta ie dessegur l bilanz de previjion per l 2013. "Messon calculé scurtamënc y mudazions, perchël speron de pudëi tosc marciadé cun Guviern Talian sun la soma da judé a ressané la finanzes dl Stat" à dit l presidënt Luis Durnwalder. La majera reduzions ie tlermënter da se aspité sun i custimënc che ne muessa nia vester, perchël saral da fé cont cun reduzions nia dlonch valives.

Per sustenì l'economia da tlo, se à la Jonta provinziela tëut dant doi ponc prinzipei, l ressanamënt de vedli frabicac y l'espurtazion. L presidënt dla Provinzia à tla cunferënza stampa rujenà de reduzions de chëutes per ressanamënc energetics de vedla cëses. Chësc sustëni dëssa aldò de Durnwalder vester tacà al cunvenzioné de cuatieres per jënt da tlo. La Provinzia judëssa sibe chiche fej i lëures de ressanamënt, che nce chëi che compra l cuatier. Normes che ie bele per la ziteies dëssa aldò dla Jonta unì slargedes ora a duc i luesc dla provinzia.
L segondo ciamp strategich reverda l'espurtazion. L Südtirol ne ie nia plu bon de vënder duc si servijes y prudoc sciche plu da giut y muessa perchël se dé da fé tl'espurtazion. Permez ala provinzies ujines sciche Trënt cun 23% de esport y l Tirol dl Nord cun 32%, ie l Südtirol cun me 19% plutosc tardif. I assessëures provinziei ulëssa judé tl ciamp dla tueda dl marcià, dla promozion y tla garanzies de credic.

Aldò dl sparani che l Guviern Talian se damanda tla lege "spending review", messerà la Provinzia fé ne lege per pudëi mëter adum repartizions provinzieles. Acioche la pruzedures de sparani ne se tira nia massa ala longes ulëssen ntegré i pruvedimënc tla lege de cont finel dl bilanz.

Te Cunsëi provinziel iel bele la prupostes de lege sun la toponomastica, la democrazia direta y la lege de vela. La Jonta provinziela ulëssa ti proscimi mënsc mo purté ite prupostes de lege per la families, l sparani per frabiché, urbanistica y svilup teritoriel. La cumpëida di culaburadëures provinziei dëssa unì smendrida do y do zënza tò su de nueves canche i vedli va n pension. Reduzions dëssa nce unides fates per i auti de servisc. L presidënt à rujenà de auti a leasing, de auti privac di assessëures y che nia uni assessëur ne ebe n auto de servisc me per se. Sun l program dla Jonta provinziela iel nce na regulamentazion nueva per i cumpaniadëures a jì da mont su do che la normes ie mudedes a livel statel. Leprò ruva mo l mëter n droa de majera reformes sciche chëla dla scola y dla sanità.

as