Atualità
Hotiei possa inò damandé cuntribuc y mprësc’
USP – Cun l prim de setëmber possa hotiei y ustaries inò damandé aiuc dala Provinzia per nvestimënc. La Jonta provinziela à (NCUEI) ai 27 de agost, do belau trëi ani fërmes, dat pro che la mëndra aziendes possa damandé cuntribuc y mprësc’. Ala majera aziendes vëniel dat la puscibltà de credic a bon marcià.
Davia che la Provinzia ne ruvova nia plu do a paië ora i cuntribuc per nvestizions turistiches, à la Jonta provinziela dl 2009 dat pro de fermé la dumandes. "Ntan an paià ora truep di cuntribuc dai pro a na maniera da pudëi inò azeté dumandes nueves" à dit l presidënt Luis Durnwalder riesc do la senteda dla Jonta provinziela. Chësc uel di che dal prim de setëmber ne possa nia me fé dumanda pitla aziendes de raions turisticamënter puech svilupei, ma duta l'ativiteies de albierch unfat de cë grandëza y raion.
Da la grandëza de atività depënt la sot de finanziamënt provinziel. Aziendes cun manco de 500.000 euro de volum de afares te n ann, possa damandé cuntribuc danter 13 y 16 percënt dl nvestimënt recunesciù o n mprëst a bon marcià. De majera aziendes possa me damandé n aiut dal fond de rotazion te forma de n credit a bon marcià. "La Provinzia dà su n credit nchin a 10 ani, al plu 80 percënt. Sce l se trata de 15 ani, iel 55 percënt" spiega l assessëur Hans Berger sorissan che l turism vën n cont dl fond de rotazion metù al medemo livel sciche d'autri ciamps economics. Aldò la normes nueves vëniel dat n credit per nvestimënc che ruva nchin al plù a 2,5 milion de euro.
La Jonta provinziela à nce dat pro che per aziendes nueves o la sëurantëuta te de pitli luesc, vëniel mprestà nchin a 50.000 euro mpede 30.000.
as
