Atualità
Cudejel sun l’Autonomia per turisc’
USP – Ciuldì ie pa la tofles di luesc da nëus te trëi rujenedes? Ciuldì vëniel pa tl Südtirol sentà tan de lëns da mëiles? Co se mantën pa na tel pitla provinzia da mont? A chësta dumandes che feter sies milion de turisc’ se fej for inò canche i vën tl Südtirol, respuend n cudejel nuef. La Jonta provinziela à (NCUEI) ai 27 de agost dat pro de stampé chësc cudejel che dëssa spieghé nosta Provinizia ai fulestieres y ti dé nfurmazion.
Sce n damanda i turisć cie che i sciazea de nosc raion, pona auden suvënz rujenan de spëisa, dla cuntreda y de persunaliteies. Ma la particularità plu sota dl Südtirol ie l cunviver tla pesc de trëi grupes de rujeneda te n pitl raion. Y chësc ne vën giut ne do udù tan suvënz dai fulestieres. Purempò damanda trueps ciuldì che la tofles ie te doi y trëi rujenedes, ciuldì che l vën rujenà tudësch y ladin, scebën che l Südtirol ie pert dla Talia. La respostes vën dates te n cudejel per l turism che la Jonta provinziela à dat pro de dé ora per spieghé la cumenanza y la cultura dl cunviver.
Do la senteda dla Jonta à l presidënt Luis Durnwalder spiegà che l unirà scrit ora la stampa de 500.000 pec dl cudejel nuef. L custimënt udù danora ie de feter 100.000 euro. Aldò dl presidënt ie chësc plutosc n pitl custimënt cun na gran fazion. "L cudejel unirà spartì ora debant a hotiei y lies per l turism. A chësta maniera vëniel arjont gran pert di turisć che vën tl Südtirol cun feter l medemo custimënt sciche na campania de retlam te na gran zaita da uni di taliana.
L cudejel sun l'Autonomia unirà dat ora per tudësch, talian y nglëisc.
as
