Atualità
Scultures tl Assessorat Ladin nvieia al dialogh
USP – L Vëscul, l Presidënt dla Provinzia y l Assessëur Ladin à tla chëurt dl palaz provinziel 2 a Bulsan ai 04 de setëmber descurì trëi scultures che nvieia al dialogh. L opra d’ert metuda ora ie esprescion de ancunteda tl dialogh y passenea drët bën dan porta dla sënta dl Assessorat provinziel ladin ulache passa truepa jënt de duta la grupes de rujeneda.
Trëi scultures de mesures sëuranatureles, depëntes a cuecen, metudes su bele amez ala chëurt dl palaz provinziel: l'opra artistica de Willhelm Senoner de Urtijëi reprejentea doi che se rejona y l terzo che scota su. Duta trëi figures ie sun n pustamënt y dancà iel mo n cuarto pustamënt uet.
"La persona possa se svilupé tl dialogh" à dit l assessëur Florian Mussner pra la descurida. L simbol de trëi figures te na provinzia cun trëi grupes de rujeneda ie sterch. Leprò mo n cuarto pustamënt che pieta lerch. „Chësta cuarta lerch ie tlo per chëi da demez, a chëi che n muessa ti fé na ntegrazion plu saurida ti pitan solidarietà. Chësc ajache vivon duc sun l medemo mond y messon cialé de ti jì permez al'auter" à dit l Assessëur Ladin.
La figures dëssa dé da pensé. "Uni un dëssa se rënder cont che tl Südtirol possa uni un viver si cultura y se giamië cun d'autra cultures," à sorissà l presidënt Durnwalder metan a cuer de avëi respet dl'auter unfat da ulà che l vën.
L valor y la denità dla persona ie nce stat la basa dla paroles dl vëscul Ivo Muser che à prià dla benedescion dla jënt che se fërma dan a chësta scultures.
Fotos dla descurida dla figures sun la plata facebook „Jonta dla Provinzia de Bulsan".
as
