Atualità
Assessorat Ladin tla rë de mendranzes a Aosta
USP – L festival dla mendranzes a Aosta à ntan l fin dl’ena abù n gran suzes de partezipazion y publich. Ghesc’ prinzipei dla cuarta edizion ie states reprejentanzes dl’Irlanda, dla Luisiana y dl Friul. L Assessorat Ladin dla Provinzia de Bulsan à fat pea prejentan i Ladins dla Dolomites y curan i cuntac istituzionei aldò dl’idea dl “Festival dei Peuples Minoritaires” per rafurzé i cuntac danter mendranzes de rujeneda.
Bele per l cuarto iede à l Assessorat ala cultura dla Region Aosta dai 7 ai 9 de setëmber metù a jì n festival per rafuzé y n ngrandì na rë de cuntac danter populi de mendranzes a livel nternaziunel. Dan doi ani ova l Assessorat Ladin dla Provinzia de Bulsan fat pea l festival sciche ghest prinzipel, chëst ann iel unì nvià na reprejentanza galega dl'Irlanda, i franzëusc-creolics dl Louisiana/USA y i friulans. Ntan i trëi dis de festival iel unì tenì n forum per se baraté ora a livel instituzionel, cunzerc y musical per prejenté la mendranzes de rujeneda. L pensier zentrel dla reprejentanzes di populi ie stat chël de ulëi arjonjer na defendura teritoriela sterscia. "Chësc ie per truep populi drët rie ajache la jënt che rejona la rujeneda ie tan sparpanieda ora. Trueps ne à nia na cunzentrazion de jënt granda assé, sciche la ie per fertuna da nëus ti luesc ladins", nsci l resumee dl diretëur de repartizion Alexander Prinoth.
Sëuraprò ala trëi reprejentanzes prinzipeles, se à nce d'autra mendranzes prejentà al gran publich unì adalerch tla Val d'Aosta. L Assessorat Ladin à trëi dis alalongia dat ora materiai de nfurmazion sun la scola y cultura ladina. "De gran valor ie nce stat de avëi curà i cuntac cun l assessëur Laurent Viérin y reprejentanc aministratives" spiega l diretëur dla repartizion ladina.
De plu sun l festival nce tla plata web http://peuples.patoisvda.org/it/
---
D'autri comunicac stampa sun chësc argumënt
Ladins prutagonisc' de na nueva rë de cuntac danter mendranzes - 04.09.2010
Festival dla mendranzes: la ulentà de mantenì fej la defrënzia - 04.09.2010
Nota ladina tl prim di dl festival dla mendranzes a Aosta - 02.09.2010
Ladins pra l Festival dla mendranzes de Aosta - 26.08.2010
as
