Atualità
Ancunteda a Roma per l cuntribut dla Provinzia a ressané la finanzes stateles
USP – I tecnics dl’Assessorat provinziel ala finanzes se anconta (NCUEI ai 10 de setëmber) cun tecnics dl Guviern talian per stlarì la cundizions ududes dant dai pruvedimënc statiei che la Provinzia muessa tenì ite per judé a ressané la finanzes dl Stat.
L fin dl'ancunteda danter Guviern Talian y Provinzia ie chël de stlarì la basa tecnica a na maniera che l possa pona unì scumencià la tratatives a livel politich. Chësta ancunteda che ie aldò de Durnwalder unida a se l dé sun ntervënt dl presidënt dla Talia Napolitano, finà via feter mez ann de chiet do che l Presidënt dla Provinzia se ova ancuntà cun Mario Monti.
Aldò dl'Acurdanza de Milan dëssa la Provinzia de Bulsan giaté 90% dla chëutes stateles che vën paiedes ite tl Südtirol. "La chëutes nueves che ie unides metudes su per ressané la finanzes stateles ne ie nia chëutes spezieles sciche chëles per curì l dann de catastrofes natureles, perchël iel da stlarì sce la Provinzia à la rejon de giaté velch" à dit Luis Durnwalder do la senteda dla Jonta provinziela. Tl'ancunteda a Roma dëssel danterauter nce unì stlarì tant che la Provinzia muessa tenì te cassa sciche resserva per l Stat.
Canche la cuestions tecniches sarà tleres, uelen scumencé la tratatives cun l Stat de tant che la Provinzia dëssa de ju y dl respet dl'Autonomia n cont dla maniera co che la Provinzia sprarania chisc scioldi. Durnwalder à dit che l spera de ruvé a una cun l Guviern a na maniera da pudëi tré de reviers i recursc pra la Suneria costituzionela.
as
