Atualità
Cumiscion nueva per la scunanza dla cuntreda
USP – Do che l ie unì metù adum la repartizions provinzieles per la cuntreda y l’urbanistica, à la Jonta provinziela (NCUEI) ai 17 de setëmber dat pro na reduzion y cumposizion nueva dla Cumiscion per la scunanza dla cuntreda.
Mpede 7 cumëmbri nen saral da mo inlà me plu cinch tla Cumiscion per la cuntreda. L ambolt de cumpetënza che ova nchinamò me na funzion cunsulënta puderà śën de ju si stima a tò la dezijions.
Nchinamò fova la repartizions provinzieles per la cuntreda y l'urbanistica reprejentedes tla Segonda Cumiscion per la scunanza dla cuntreda cun na persona per una. Davia che la repartizions ie unides metudes adum à i assessëures provinziei dat pro che la repartizion nueva ebe doi reprejentanc tla cumiscion. Nsci saral mo n reprejentant dla repartizion di bòsc y dla repartizion per l'agricultura. Te caji che reverda i monumënc culturei, uniral nce tëut ite n reprejentant de chësta repartizion.
La cumposizion nueva dla Cumiscion per la scunanza dla cuntreda ne vëija nia plu dant na reprejentanza dla assoziazions per la cuntreda y dl'Associazion provinziela di paures.
Nce la cumposizion dla cumiscion 29 ie unida regulamënteda da nuef. Per cuestions de spusté cubatura te raions categurisei sciche vërt agricul saral l ambolt de cumpetënza, n reprejentant dla repartizions per cuntreda y urbanistica, agricultura y bosc a tò na dezijion. Pra na votazion ala pèr, conta la usc dl ambolt.
as
