Atualità
Lege dla toponomastica: ancunteda cun la cumuniteies raioneles
USP – La Cumuniteies raioneles dëssa purté dant prupostes de inuemes de mëndri raions y pona saral na cumiscion paritetica a tò la dezijion. L presidënt dla Provinzia à (NCUEI) ai 17 de setëmber riesc do la senteda dla Jonta provinziela stlarì chësc pont zentrel dla lege data pro tla nuet danter n vënderdi y sada. L unirà fat n’ancunteda cun la cumuniteies raioneles.
Do che la lege sun la toponomastica ie unida data pro ti spieta l proscimo var al presidënt dla Provinzia che stlarirà deberieda cun i presidënc dla cumuniteies raioneles la pert che chëstes muessa fé. Tant che l va de bujën, ti meterà la Provinzia nce a desposizion documentazions y cunsulënza scientifica. N auter var zite ie pona l cuntrol la lege a Roma. "La lege sun la toponomastica ie n bon cumpromis che tira ite duta trëi grupes de rujeneda al medemo livel. Chësc uel di che nce i ladins à l medemo pëis de dezijion sciche la grupa de maiuranza" à dit Luis Durnwalder.
La dezijion di toponims da recunëscer ufizialmënter ti spieta ala cumiscion paritetica. I cumëmbri ne ie mo nia unic numinei, ma bele sën iel tler che l dëssa vester persones cumpetëntes per la materia. L cumpromis dat pro te Cunsëi provinziel vëija dant che l sibe la Cumuniteies de raion a fé prupostes de toponims sun la basa dl'adurvanza y dl cuntest storich. Davia che la Cumuniteies ie na reprejentanza di chemuns, iel ala fin dla finedes chisc che fajerà la prupostes. L presidënt vëija chësc de bon uedl, ajache l possa vester che vel mont o raion ebe ti luesc ntëurvia de plu denuminazions, perchël ie na bona sce la prupostes vënie mandedes inant a livel de raion.
"Tres la lege nueva giaterà nce mëndri raions, montes, ruves y valedes ufizialmënter si inuem uriginel. Chësc ie dessegur na bona, ajache se aspiton n'azetanza nscila sciche pra i toponims ladins che ne ti desturba a deguni" à dit Durnwalder.
as
