Atualità
Jonta dà pro de cumpré 164 cuatieres soziei
USP - Te cuestions de cuatieres soziei à la Jonta provinziela (NCUEI) ai 17 de setëmber tëut trëi dezijions. L unirà cumprà 164 cuatieres te 16 chemuns (nce a Urtijëi), l vën scemplificà la pruzedures per ressané cuatieres soziei y a Maran vëniel cumprà 50 cuatieres per la categuria de davani mesan.
Per scemplifiché la pruzedures de ressanamënt de cuatieres soziei à la Jonta provinziela tëut na dezijion de basa. "L problem ie che i lëures muessa unì scrii ora singularmënter per uni cuatier y chësc cumporta ntadivamënc nchin a dut n ann" à dit l presidënt Luis Durnwalder. Na soluzion iel unì abinà te na pruzedura nueva che vëija dant l scrì ora de lëures a livel de raion tres l'agenzia nueva dla Provinzia. "Tlo possel unì dat dant vel parameter per i preventives dla firmes" à spiegà l presidënt.
L resultat dl pruzedura nueva sarà pona na grupa de firmes a chëla che l ti possa unì dat la ncëria de ressané cuatieres da cajo a cajo tl raion de cumpetënza. "Chësta ie nce na puscibltà per i artejans che possa se mëter adum y ressané i cuatieres soziei" à dit Durnwalder nunzian na soma de 11 milion de euro per chisc ressanamënc. La Jonta provinziela à nciarià l'Agenzia per ncëries publiches de nvië via n proiet de prova.
I assessëures provinziei ie stai a una de cumpré 164 cuatieres soziei mpede i frabiché nstës. "On metù dant n urientamënt per l priesc che ie danter 2000 y 2300 euro al meter cuadrat. Chësc basta dantaprima ti raions da na pert ora per cumpré cuatieres" à dit Durnwalder. L custimënt di 164 cuatieres te 16 chemuns ie de 31 milion de euro. Danter chisc chemuns iel nce Urtijëi ulache l vën cumprà 10 cuatieres.
L cuncors per 50 cuatieres a Maran da sëurandé ala categuria de davani mesan ie jit a bon fin. Te doi ani puderà la Provinzia sëurantò chisc cuatieres per les dé inant al families cun n davani mesan.
as
