Atualità
Azetà i mioramënć dla pista Boé
USP - La Comisciun provinziala por la sconanza dla contrada à azetè le proiet por miorè la pista dai schi Boé tl Comun de Corvara.
Dlungia la staziun a munt dla furnadoia de Boé ô la sozietè tó demez perts de crëp y avalié fora la pista a na maniera che i iać dla nëi pois passè plü saurì. Aladô dla sozieté dla furnadoia va chësc debojëgn por podëi parè demez la nëi y garantì a chësta maniera plü segurëza te chësc raiun che é inće tl cataster dles lovines.
Le raiun di laûrs preodüs à na lunghëza de feter 210 metri, na larghëza mesana de 7 metri y n'altëza de n meter. La Comisciun provinziala à azetè che al vëgnes fat i laûrs y se damana che al vëgnes daldô indô fat crësce ite le raiun adoran le material che gnarà tut demez. Le material che romagnarà mëss gnì metü tl raiun dles pistes en acordanza cun le Sorvisc dla Forestala. Le patrun di laûrs mëss implü garantì na cauziun de 15.000 euro.
usp
