Atualità
La Comisciun por la contrada dij de no ala strada de Antersasc
USP - La Comisciun provinziala ne à nia azetè te süa sentada (da INIER) ai 18 de setëmber le proiet laurè fora danü por na strada sön la munt de Antersasc.
La secunda Comisciun por la sconanza dla contrada à controlè le proiet sön le tru d'azès ala munt d'Antersasc. Le proiet odô danfora da realisé n tru por tractors nü , 860 metri lunch ti comuns de San Martin de Tor y Badia.
La Comisciun metüda adöm da nü componënć cun a će le diretur dl Ofize provinzial por la sconanza dla contrada, Adriano Oggiano, à sciuré zoruch le proiet por le secundo iade.
La rajun ćiodì che al é gnü tut chësta dezijiun é da öna na pert che la strada passa fora por n raiun trëi iadi sot a sconanza (le Parch Natural Pöz-Odles, le Raiun Natöra-2000 d'interès europeich y le raiun dl Patrimone natural dl'umanité dl'UNESCO), y dal'atra pert ćiodì che le patrun n'à nia tignì cunt dla soluziun de compromis fata dala Comisciun por la sconanza dla contrada d'aurì dl 2011 da fà n tru plü cört.
"Le proiet Antersasc II Varianta 2012 ti corespogn plü o manco al proiet dè jö dl 2008. Al vëgn ma lascè demez i ultimi 300 metri", spliga le diretur Oggiano. „Al n'é nia gnü miorè le proiet che é gnü refusé ala fin de setëmber dl 2008 dala secunda Comisciun por la sconanza dla contrada", dij le presidënt dla Comisciun. "Al momënt él n tru forestal che va dala munt ćina a Plan da Locia, che é gnü laurè fora dan da püch. Al manćia ma i ultimi 1160 metri (150 metri de deslivel)", spliga Oggiano. La Comisciun arata che al foss da ressanè i frabicać dla munt por chi che al ne va nia debojëgn da fà le tru. "Sciöche an vëiga da d'atri ejëmpli ne vara nia assolutamënter debojëgn de n tru da podëi passè por ressanè o fà sö danü frabicać", insciö Oggiano.
usp
