Atualità
Nolunta’s ai 26 de setëmber a Bruxelles tres Uploadsounds 2012
USP – La scumenciadiva de Uploadsounds lieda al cuncors de mujiga per purté inant i jëuni de mujiga, pieta nce cunzerc oradecà. La grupa Nolunta’s de Gherdëina che à venciù l pest de miëura grupa dl Südtirol Uploadsounds, sunerà ai 26 de setëmber a Bruxelles deberieda cun i Rebel Rootz che à venciù l cuncors tla categuria rebell.
Ntan la mostra dl'Euregio "Limits line" a Bruxelles, sunerà la doi grupes Nolunta's y Rebel Rootz n mierculdi ai 26 de setëmber tl Live Music Cafè. A chësta maniera va la scumenciadiva Uploadsounds 2012 inant cun la promozion de jëuni talënc de mujia tla region y oradecà. Chësc ie stat mesun metan a jì sinergies cun de majeri festival de mujiga taliani y europeics. L'idea de Uploadsounds, metù a jì dala Provinzia de Bulsan n culaburazion cun la Region Trentino Südtirol y l Land Tirol, ie de svilupé promozion y la capaziteies de jëuni de mujiga ti dajan sustëni y ti pitan ucajions de suné.
I Rebel Rootz à nuzà si pest per cumpré strumënc y per fé na prejentazion nueva tl web se nuzan de cunsulënza y cumpaniamënt de Daniela Bozza - executive producer dla plataforma MTV New Generation. La grupa de Gherdëina Nolunta's y la grupa Falling for Beautiful d'Austria à pudù lauré cun l band coach, arangiadëur y produtëur Wolfgang Schwericke.
La grupa Nolunta's de Urtijëi ie metuda adum da Andreas Kondrak (usc, chitara, madolina, ukelele), Luigi Romanelli (chitara prinzipela), Hannes Senoner (usc, percuscion, - jolly), Simon Paur (armonica "Steirische"y orgun da bocia), Stephan Canins (bas, e-bass y usc), Leo Grossrubatscher (tamburdl y usc).
Premiei de Uploadsounds 2012
Rebel Rootz: miëura grupa rebell
Falling for Beautiful: miëura grupa dl Tirol
Nolunta's: miëura grupa dl Südtirol y pest Facebook dla zaita Alto Adige
De pul sun la scumenciadiva Uploadsounds nce tl web http://www.uploadsounds.eu/
as
