Atualità
Trëi dis de inuvazion: dai 27 ai 29 de setëmber festival a Bulsan
USP – N juebia, vënderdi y sada dl’ena che vën deventerà Bulsan cun l "Innovation Festival" la capitela dl’inuvazion. Dai 27 nchin ai 29 de setëmber iel passa 50 ucajions per nrescì velch de plu da referënc renumei. L program cun n parcour ntëur ala plaza Walther, pieta nce na nuet longia dla tueda y n program culturel. L argumënt zentrel dl festival ie l’”energies nueves”.
Te 14 lueges tla zità de Bulsan cun 50 manifestazions y 100 referënc vëniel bele tla prima edizion dl festival dl'inuvazion pità na lingia de ucajions per nrescì la stredes dl daunì. N puerdà jì a descuscions, workshops y referac, ma nce vijité stazions ineratives y n program cun truepa scumenciadives cultureles. Leprò iel nce n program dedicà ala families che ti va do al moto "energies nueves".
Atrazion dl festival sarà nce la persunaliteies sciche l guru dl'energia Jeremy Rifkin, Rigoberta Menchù che à giapà l pest Nobel y l presidënta da dant de Confindustria Emma Marcegaglia o i ministri Francesco Profumo y Corrado Clini cun nce l presidënt dla Telecom Franco Bernabè.
L festival dl'inuvazion vën giaurì ufizialmënter cun na cunferënza stampa cun i assessëures provinziei Roberto Bizzo y Sabina Kasslatter Mur n reprejentanza dla Jonta provinziela, l presidënt de TIS Nikolaus Tribus y l presidënt dl cumité scientifich Massimo Egidi.
La cunferënza stampa ie prugrameda per n juebia, 27 de setëmber, dala 10.00 tl Museion, streda Dante a Bulsan.
Nfurmazion sëuraprò sun l festival dl'inuvazion ie da abiné sun la plata web ufiziela (www.innovationsfestival.bz.it), sun Facebook (www.facebook.com/InnovationFestivalBz) y Twitter (@InnoFestBZ).
as
