Atualità
Ai 11 de utober rendicont dl'evaluazion tla scoles ladines
USP - L Cumité per l’evaluazion dla scoles ladines fajerà n juebia, 11 de utober na relazion de si atività. L’analisa dla cumpetënzes di sculeies ie n mesun per museré l garaté dl lëur didatich dla scoles. Pra la prejentazion, tla sënta dla Ntendënza Ladina a Bulsan, uniral fat n cheder generel l lëur fat nchinamò dajan nce na udleda al daunì.
L Cumité per l'evaluazion dla scoles ti luesc ladins dla Provinzia de Bulsan ova nvià via si atività tl ann de scola 2004-05. Ntant iel unì fat na lingia de nrescides y analises, dajan nce ora sies publicazions. Tla relazion uniral fat la pont dla situazion sun la basa dl lëur fat y n pruspetiva dl daunì. Mplu uniral nce prejentà la mpartizion nueva dl Servisc.
L rujenerà l assessëur provinziel Florian Mussner, l ntendënt Roland Verra y l presidënt dl cumité Lois Ellecosta.
La relazion tla sala "Franz Vittur" tla Ntendënza Ladina, streda Binder/Bottai nr. 29 a Bulsan, scumëncia dala 10 danmesdì.
Culaburadëures di media ie nviei ala relazion y a fé al savëi i cuntenuc.
as
