Atualità
Lege finanziera 2013: revijion di custimënc, aministrazion digitela y reduzions IRAP
USP – A pèr cun la pruposta dl bilanz de previjion, à la Jonta provinziela (NCUEI) ai 08 de utober nce dat pro la pruposta de lege finanziera per l 2013. I azënc prinzipei reverda la revijion di custimënc publics, lascé do tarifes per l’aministrazion digitela y reduzions dla chëuta per ativiteies IRAP.
I pruvedimënc per smëndrì i custimënc publics udui dant zentralmënter a Roma à nce tla provinzies autonomies de bujën de na basa de lege. Nscì à la Jonta provinziela udù dant articuli dla lege finanziera che reverda l mëter adum repartizions provinzieles, reduzions o tò demez cumiscions y cunsëies de aministrazion. Do che na prima pruposta ne ie nia passeda te Cunsëi provinziel, à la Jonta provinziela dat pro na pruposta nueva.
Per nvië for de plu a se nuzé dla pusciblteies digiteles per cuestions aministratives sciche dumandes y nscì inant, à la Jonta provinziela dat pro la pruposta de lascé do la chëuta de 1,87 percënt sun la somes paiedes ite zënza adurvé papier.
La chëuta IRAP dëssa aldò di assessëures provinziei unì lasceda do ala cëses de paussa y a firmes che fej sëntes nueves dajan da lëur. La reduzion ie te chësc segondo cajo ududa dant per i prim trëi ani (a ezezion de banches y istituc de assegurazion).
Per auti a hybrid y a lectrisc, iel udù dant na reduzion per i prim trëi ani. Leprò nce de plu stlarimënc de caji particuleres.
Tl mpëni de sustenì l'economia te tëmps de crisa, à la Jonta provinziela udù dant de auzé la soma per garanzies de mprësć tl ciamp dl export, da 400 a 510 milion de euro.
Dal'autra pert ie nce pruvedimënc de sparani unì juntei tla pruposta de lege finanziera. L mpëni de smëndrì la cumpëida de 555 dependënc publics a messù unì spënt a do l 2015, ajache l ie de manco che va n pension permez a chël che fova unì udù danora. La Provinzia sparanierà aldò dla pruposta tl rembursamënt de marëndes (20 euro mpede 25), de viages (0,40 euro al chilometer mpede 0,53). La ndeniteies per trasfertes tumerà demez pra dependënc provinziei y nsenianc. Tl mpëni de sparani dëssa la lege finanziera nce udëi dant la soma de diretëures de departimënt, de repartizion y de ufizies provinziei.
Da nuef iel udù dant che documënc che reverda finanziamënc publics muessa riesc unì publichei y nia permò canche (l cuntribut) ie unì paià ora. I cuntribuc per frabiché mplanc portamont dëssa pudëi unì spartì su te cater ani mpede me te trëi ani.
Dan purté la pruposta de lege finanziera te Cunsëi provinziel unirala mo purteda dant al Cunsëi di chemuns.
as
