Atualità
Dat pro la pruposta per l bilanz provinziel 2013
USP – L bilanz provinziel 2013 sarà me 2,6% mënder permez a chël che fova unì dat pro per chësc ann. La Jonta provinziela à (NCUEI) ai 08 de utober dat pro la pruposta de 4,998 miliardes de euro per l bilanz de previjion dl 2013. Davia che vel capituli ne possa nia unì taiei, se sposta la reduzion dl bilanz sun i capituli plu flessibles y tlo uniral a se l de na reduzion mesana de 7,1 percënt.
La cundizions de sparani metudes dant da Roma ie mo for melsegures. "Sce la nes buta dan suneria pudëssel mo unì ora doi iedesc 190 milion de plu, ma chisc pudons for mo junté tl bilanz" à spiegà l presidënt Luis Durnwalder tla cunferënza stampa riesc do la senteda dla Jonta provinziela.
Permez ala previjions tratedes tl'ultima sentedes, se tratovela chëst iede dantaprima dl finanziamënt per i chemuns. Sciche ti autri capituli nia liei a cuntrac, fovel udù dant na reduzion de 7,1%. I assessëures provinziei ie pona ruvei a una de udëi dant 12 milion de plu per i chemuns. Chësta soma mplu dëssa aldò dl presidënt Durnwalder unida nuzeda per nvestizions a chësta maniera sustenì l'economia da tlo. A chësta maniera iel unì udù dant 436 milion per i chemuns.
Mudazions dl'ultima senteda dla Jonta reverda nce la furmazion, per chëla che n à mo juntà 5 milion de euro per l'Università de Bulsan y 3 milion per l'Eurac ruvan a n capitul de 633 milion (permez a 624 per l 2012). Te tëmps de sparani à l presidënt sorissà la mo majera mpurtanza de mëter prioriteies al bilanz provinziel. Nsci iel mo unì juntà 5 milion al capitul dl'inuvazion che ruva a chësta maniera a na soma de 35 milion (permez a 33 per l 2012).
La spartizion de sparani ne ie nia unida azeteda da duc i assessëures. La pruposta de bilanz 2013, che vën śën data inant al Cunsëi provinziel, ie unida data pro cun cater assessëures a una, doi de contra y doi astenscions. "Ne pudon nia dé ora de plu che ne on, ma mpurtant ie che ne fajon nia debic" nsci la cuntlujion de Luis Durnwalder.
as
Landeshauptmann Durnwalder zu den Prioritäten im Haushalt 2013
- Scarica il file audio 1922 kb
