Scora / Cultura | 09.10.2012 | 17:05

Cuncors de ideies per la Capitela dla cultura 2019

USP – Bele l se anjenië ie na arjonta: nce sce la Provinzia de Bulsan se mpënia cun si partner dl nord est dla Talia a deventé capitela europea dla cultura 2019, uelen bele nuzé la fasa de preparazion per ti dé plu valor ala cultura. Un de chisc vares ie l cuncors de ideies per lies cultureles che ie unì prejentà (NCUEI) ai 9 de utober.

Da fauré 2011 vëniel tl Südtirol y tl Trentino, ma nce tla regions Veneto y Friul, deberieda cun la zità de Unieja laurà per la candidatura a capitela dla cultura. L mpëni che vën metù te chësta candidatura ne dëssa nia vester per nia, nce sce n auter raion ëssa da deventé capitela. „Sambën che speron de giapé chësc titul, ma sce l nes garata bele a nuzé la fasa de candidatura per dé na sburdla acioche trueps se debe ju cun la cultura y si cuestions zentreles, ons bele n gran suzes" à dit l'assessëura Sabina Kasslatter Mur pra la prejentazion dl cuncors de ideies che ie nce unì publicà tla gazeta ufiziela dla region.

Chësc cuncors dëssa nvië a se de ju cun la cultura y la candidatura, y ie pensà per lies cultureles che vën bele da plu de n ann sustenides da una dla trëi repartizions ala cultura dla Provinzia de Buslan. L vën cris do ideies y proiec che pudëssa unì realisei tl ann 2019 n cajo che l titul de capitela dla cultura vënie dat ala grupa cun nce l Südtirol. „Ulon lauré deberieda trajan ite tla candidatura lies cultureles, scoles, cooperatives y nce d'autra istituzions" à dit l assessëur Christian Tommasini.

Nscì sciche duta la candidatura, vel nce per l cuncors de ideies l moto „cultura y economia". L vën cris proiec che debe nce pëis al cuntest dl plurilinguism, scebën che l vën lascià gran lidëza.

La ideies possa unì mandedes ite nchin la 12.00 dl prim de dezëmber al'adres ufficio.cultura.italiana@provincia.bz.it. La ideies che unirà crides ora unirà premiedes cun n pest de 4.500 euro.
Proscimamënter unirà scrit ora mo trëi cuncorsc de ideies cun l medemo fin, ma per d'autra grupes de nteres. La Fundazion Cassa dl Sparani scrijerà ora n cuncors per lies cultureles istituzionalisedes, dla Camera dl Cumerz per la scoles autes  l'Assoziazion dla cooperatives per la cooperatives.

as

Galaria dales fotografies

Prejentà l cuncors de ideies: (d.m.c.) l presidënt dla Camera de Cumerz Ebner, i assessëures Kasslatter Mur y Tommasini, l presidënt dla Fundazion Cassa dl Sparani Brandstätter y l presidënt de Confcooperative Grata

Downloads