Atualità
Le protocol dl trasport, n travert storich por les Alpes
USP – Tla Talia àra doré dî, porchël é la sodesfaziun por la sconanza dles Alpes ćiamò maiù: Le Parlamënt à ratifiché l’ultim protocol dla Convenziun dles Alpes che manćiâ ćiamò, chël dl trasport. “La ratificaziun é tardia de agn, mo al é finalmënter n vare concret por na majera sconanza dles Alpes che n Stat po fà” se inconforta l’assessur por l’ambiënt Florian Mussner.
Cun la ratificaziun dl protocol dl trasport aprovëia le Parlamënt inće la proibiziun de strades nöies che passa fora por les Alpes. Al é n stromënt implü por etablè na politica dl trasport sostenibl. Inće le referimënt al bojëgn da spostè le trasport de marćianzia dala strada ales scines porta pro a chësc.
Mussner, che é responsabl por l'ambiënt tla junta provinziala, sotrissëia che les Alpes ne po nia gnì confrontades cun d'atri raiuns: "Döt le raiun dles Alpes é n ecosistem dër sensibl, porchël mëssel gnì sconè cun mosöres prezises", dij l'assessur provinzial. Le conzet dla sostenibilité messess stè dancà, ajache scenò ne po le svilup nia crësce por la lungia. "Avisa le trasport rapresentëia te chësc caje na desfidada particolara", spliga Mussner.
Inće sce al ê bele dî gran ora che le protocol dl trasport gniss ratifiché tres le Parlamënt, él porimpò n suzès. A chësta moda reconësc la Talia finalmënter, che les Alpes é n raiun che à debojëgn de na sconanza particolara, n aspet, che la Junta provinziala alza fora da dî incà.
usp
