Atualità
Ancunteda cun l minister Passera sun l’Autonomia, aeroport y cumerz
USP – Cin argumënc se à l presidënt dla provinzia Durnwalder deberieda cun i assessëures Widmann y Bizzo tëut dant per l’ancunteda cun l minister Corrado Passera, (INIER) ai 18 de utober a Bulsan. La se tratova de respeté la regules dl’Autonomia, dl scrì ora di joi danter Bulsan y Roma, l daunì dla firma de silizium MEMC, l recurs al regulamënt provinziel per l cumerz y finanziamënc per la RAI de Bulsan.
N ucajion dl forum di mprenditëurs tl palaz Mercantil a Bulsan à Durnwalder, Widmann y Bizzo ancuntà l minister per nfrastrutures y svilup economich Passera. Tlermënter iel unì rujenà dla tenscion ti raporc danter Bulsan y Roma. L presidënt dla Provinzia à mo n iede segurà che l Südtirol juderà pea a ressané la casses stateles. "La se trata mo for dla cundizion che l muessa dant unì marciadà tant che paion al Stat y l nes vën pona lascià la lidëza ulà sparanië" à spiegà Luis Durnwalder do l'ancunteda. Passera à mustrà cumprenscion per chësc che la Provinzia se damanda y à sorissà che no Roma y no Bulsan ne prufitea de tenscion. "L minister nes à mpermetù che l tenirà sun chësta posizion nce a Roma" dij l presidënt dla Provinzia.
L segondo argumënt de chël che l ie unì rujenà ie l aeroport de Bulsan, plu avisa i joi da Bulsan a Roma. La cunzescions per chisc joi toma de nuvëmber y perchël iel de bujën de les slungë y tl medemo tëmp de nvië via n cuncors nuef. L organn de cumpetënza ie l'autorità per i joi ENAC, ma sciche n ti à prejentà a Passera, macia l bënsté da pert dl Stat.
N auter argumënt dl'ancunteda ie stat l regulamënt per l cumerz tl Südtirol, a chël che l ie unì fat recurs da pert dl Stat. I doi ponc zentrei ie tlo la pruibizion de cumerz al detail te raions de produzion y i orars dla butëighes che aldò de Roma ie massa restritives. L assessëur Widmann ie for inò pra tratatives a Roma ulache l vën cialà de stlarì la posizion dla Provinzia. "La se trata de seguré la butëighes ti luesc y tl medemo tëmp la fundamëntes de nosta urbanistica che unissa ndeblides sce l possa unì vendù a detail ti raions de produzion" spiega l presidënt dla Provinzia. L minister à azetà de ti jì do a chësta argumentazion deberieda cun l'autoriteies a Roma.
L'ancunteda cun l minister Corrado Passera ie jita inant cun la problematica dl finanziamënt di programs tudësc y ladins dla RAI de Bulsan. "Sce la va mo inant nscila cun l scurté da pert de Roma, ne ie la RAI tosc nia plu bona de garantì chisc programs de televijion" spiega Durnwalder. Perchël iel inò unì fat la pruposta che la Provinzia sëurantole l finanziamënt. "Chësc segurëssa l daunì di programs dla RAI de Bulsan y ti tulëssa ju pëis ala casses dl Stat" à detlarà l presidënt dla Provinzia. Chisc argumënc ie unic metui a cuer al minister Passera a na maniera che l i porte inant a Roma per pudëi prësc ruvé a na soluzion.
N argumënt che reverda dantaprima la stieres dl raion de Maran ie l daunì dla firma de silizium MEMC a Sinich. La Jonta provinziela cun l assessëur Bizzo se mpënia dassënn per salvé la stieres tla firma MEMC. Ma tlo iel debujën dl aiut dl Stat. "La se trata che la MEMC ruve pra strom a miëur marcià nchin che l gestëur dla rë dal strom Terna ne tacan nia adum la linea dl Prëner" nsci Durnwalder. Sibe l argumënt dl strom a miëur marcià che nce curì la locia di culegamënc per l strom ie unic metui a cuer al minister talian.
as
