Atualità
Cumité interstatel porta inant l tunel dl Prëner
USP - „Sce l ne suzed nia mo velch, pona uniral tenì ite program ti lëures per la linia dl Prëner, ajache duc i partner tën da si mpënies de finanziamënt.” Chësta ie la contlujion dl presidënt dla Provinzia Durnwalder, (NCUEI) ai 19 de utober, do la senteda dl Cumité interstatel per l tunel dl Prëner y l miuré dla linia dl Prëner, stata a Bulsan.
L cumité cun reprejentanc de stac y istituzions che à da n fé cun l miuramënt di trasporc sëura l Prëner, se à ancuntà tl cumissariat dl Guviern a Bulsan per jì tres deberieda l program di lëures y l program de finanziamënt per l tunel dl Prëner y la trates da ti ruvé permez. A chësta senteda à nce tëut pert Pat Cox, l cuordinadëur dl UE per miuré la linia danter Berlin y Palermo. La bona nutizia ie che l ne ie unì ora deguna nuviteies. " I lëures va inant bën y l vën te chësc mumënt laurà te sies lueges" à dit Luis Durnwalder do l'ancunteda. L ie bele unì scumencià a lauré sun la rola ulache passerà pona nce la ferates. "Sce l ne suzed nia mo velch, saral mesun tenì ite l program di lëures per finé l tunel y la trates da ruvé permez" à detlarà l presidënt dla Provinzia.
Nce n cont dl finanziamënt iel stat n'ancunteda positiva. Pat Cox à segurà che l miuré la linia dl Prëner ie n mpëni de mpurtanza europea. "Aldò de Cox ti dà l'Union Europea priorità a chësc duvier" à dit l presidënt dla Provinzia. De chësc viers à l cuordinadëur sorissà che l'UE tenirà da si mpëni de finanziamënt. "Chësc ie nce unì detlarà di doi stac" à dit Durnwalder.
N cont dl finanziamënt iel mo na cuestion davierta. Chësta reverda l fond che la sozietà dl'Austostreda dl Prëner à njenià per l finanziamënt dl tunel. "Chisc ie scioldi metui da na pert per l tunel dl Prëner y la trates da ruvé permez, ma i ie dla sozietà dl'Autostreda" dij l presidënt dla Provinzia. L dezijion sun chësc fond tulerà i patrons dla sozietà, danter chisc nce la Jonta provinziela y nia l Stat. L Stat ne possa nia se tò l fond. Chësc ie mo da stlarì cun l Guviern talian, scebën che Durnwalder ie dla minonga de vester sun la bona streda.
as
