Politica | 22.10.2012 | 14:25

Sistem nuef per sëurandé cunzescions da fé strom

USP – La cunzescions dal’ega per fé strom ne dëssa nia plu unides dates ora dala Jonta provinziela, ma a chiche pieta de plu. Danora muessa la dumandes passé n ejam dl dann ambientel y pona messeral unì paià na pert per ntervënc ambientei. Chësc prinzip à (NCUEI) ai 22 de utober dat pro la Jonta provinziela cun duc i assessëures a una.

L sistem nuef per sëurandé la cunzescions da fé strom se stiza sun la diretives de n decret dl Guviern talian che vëija dant l prinzip dl cuncors cun sëurandata a chiche pieta de plu cun l fin de tré ite de plu per la casses stateles. "Davia che dal 1987 ie chësta cunzescions de cumpetënza dla Provinzia, ons nce ulù adaté l sistem a nosta situazion" à dit l presidënt dla Provinzia fajan referimënt ala proscima cunzescions che toma bele te doi ani, sciche chëles de Valdaura, Marling, Pfitsch y pona nce Pruca o tla Val Badia.

Canche l toma de vedla cunzescions dëssel aldò dl sistem nuef unì dat ju dumandes nchin a na data metuda dant. I ufizies provinziei de cumpetënza analisea pona la dumandes sun aspec ambientei, de cuntreda, y de segurëza, ma nce de respet dl'eghes, di pësc y nsci inant. L'analises dëssa unì trates adum te na valutazion dl dann ambientel. Sce l resultat dla valutazion ie negativa, vëniel lascià vester la dumanda. (Te n cajo de recurs saral pona la Jonta provinziela a tò na dezijion.)
Sce la valutazion ie positiva, vëniel jit inant te chëla che la sun la basa dla dumandes azetedes, possa la sozieteies pité n priesc sucrët. Na pert de chësc priesc, aldò de na perzentuela metuda dant per lege provinziela, muessa unì paieda acioche la Provinzia y chemuns ujins possa fé ntervënc ambientei. Da nuef iel che chësta perzentuela ne ie nia plu liedia, ma vën metuda dant. I scioldi dla cunzescions che unirà trai ite muessa unì adurvei per ntervënc de segurëza sciche i lëures ti ruves da mont, contra smueies y levines o n generel per seguré raions periculëusc. L presidënt Durnwalder à te cunferënza stampa nce rujenà de udëi dant dla puscibltà de nuzé la ntredes dala cunzescions per reduzions dla tarifes dal strom per families o per caji economics speziei.

Chësc sistem per sëurandé cunzescions ie pensà per zentreles cun na produzion de passa 440 KW/ëura. Plu de pitles ne à nia chël nteres economich y dëssa perchël resté de gestion locala.

Do che la Jonta provinziela à dat pro chisc prinzips uniral śën laurà ora i particuleres per pudëi pona anjenië na pruposta de lege. "Ulon cialé de ruvé l plu riesc che la va a na lege, al plu tert pudëssen nce la junté ala lege finanziera per l 2013" à dit Durnwalder.

as