Sanité / Sozial | 22.10.2012 | 15:09

Standard nueves per la chirurgia oncologica

USP – Per ti pité l miëur tratamënt a pazienc cun tumor, vëniel metù a jì zëntri de cumpetënza. Per chësta rejon à la Jonta provinziela (NCUEI) ai 22 de utober dat pro l sistem nuef per zertifiché la repartizions di spediei dajan pëis ala majera esperienza di dutores y dla repartizions.

L tumor gauja tl Südtirol 1400 vitimes al ann. A chësta maniera ie la cures dl tumor un di majeri mpënies dl sistem de sanità. Chësc se ntensificheia cun l 2013 mo de plu ajache iló puderà i pazienc se cri ora l spedel de cura. Davia che la Union Europea se damanda n plann de cura dl tumor, iel tl Südtirol unì analisà ciuna formes de tumor che vën curedes l plu, tan de caji che l ie y cun ce njinies che l vën laurà.

Sun la basa de chisc dac iel unì laurà ora n sistem per zertifiché la repartizions de spediei che ie unì prejentà dal diretëur Oswald Mayr tla senteda dla Jonta. La zertificazion tën cont de doi prinzips de mpurtanza tla cura dl tumor. Da una pert conta l savëi dl dutor y dal'autra la pratica te chësc ciamp de ntervënt.

"Chësc segondo prinzip vën tëut a cuer tla zertificazion, te chëla che l vën udù dant na cumpëida minima de ntervënc per deventé zënter de cumpetënza. "La cures che ie debujën dan y do l ntervënt possa unides fates tl spedel plu daujin a cësa, ma per l ntervënt muessen nce fé cont de jì te n auter spedel" à spiegà Durnwalder tla cunferënza stampa do la senteda dla Jonta. I zëntri de cumpetënza possa aldò dla sort de tumor, unì njëniei ite a Bulsan, Maran, Persenon o Burnech.

La diretives de zertificazion dates pro dala Jonta provinziela cun la cunseguënzes per la singula repartizions unirà ntan la proscima enes mo tratedes cun i primares de cumpetënza per pudëi pona tò la dezijion ulà mëter a jì ciun zënter de cumpetënza. "L nes ie bën tler che uni un ëssa gën che l possa unì curà tl spedel plu daujin da cësa, ma son de chëla che mo plu mpurtant che no l vester daujin, ie de pité la miëura cures che l ie me mesun metan a desposizion dutores da na gran esperienza" à dit l presidënt dla Provinzia.

as