Atualità
Acurdanza per la scoles de mujiga tudësces y ladines
USP – Riesc do che la Jonta provinziela à dat pro de tlamé l’aministrazion dla scoles de mujiga “tudësces y ladines”, à i assessëures provinziei Florian Mussner y Sabina Kasslatter Mur (INIER) ai 22 de utober sotscrì l’acurdanza per mené la scoles de mujiga ti luesc ladins.
Da canche l fova unì metù su la scoles de mujiga ti luesc ladins ieles unides menedes da Bulsan ora deberieda cun chëles de rujeneda tudëscia. Tl'acurdanza sotscrita dai doi assessëures ala furmazion iel unì metù la fundamënta per jì inant cun chësta culaburazion. Nsci à la Jonta provinziela dat pro la numinazion dl'aministrazion cun "scoles de mujiga tudësces y ladines".
"Nosta mendranza ie tan pitla che per la scoles de mujiga nes cunvëniel mantenì chësta culaburazion per nuzé nsci sinergies" spiega l assessëur ladin, fajan referimënt ala mubilità de nsenianc de strumënc y la puscibltà per i sculeies ladins che va tla ziteies a fé la scola auta, de jì iló nce ala scola de mujiga.
Cun l'acurdanza Mussner-Kasslatter iel unì sëurandat l mené dla scoles de mujiga ti luesc ladins ala repartizion tudëscia che sëurantol a chësta maniera nce l inuem ladin. Deberieda uniral laurà per svilupé inant la furmazion de mujiga y mantenì la bona culaburazion stata nchinamo. L'acurdanza vëija dant n reprejentant ladin, numinà dala Jonta provinziela, tl cunsëi scientifich. Per mantenì la culaburazion iel unì fat ora de mëter for inò a jì ancuntedes danter la diretëura dla scoles de mujiga Irene Vieider y l ntendënt ladin Roland Verra per rujené ora i bujëns particuleres dla scoles de mujiga ti luesc ladins. L documënt sotscrì dai doi assessëures fej referimënt ala stieres di nsenianc dla scola de mujiga, l'adurvanza dla rujeneda, la partizion dla scoles, la ressorses finanzieles y de culaburadëures, mpënies de tueda, proiec de mujiga, culaburazion danter la scoles de mujiga o nce l recunescimënt de ëures tla scola de mujiga per la materies opzioneles de scola.
La scola de mujiga de Gherdëina pieta si lezions a Urtijëi y tla sënta destacheda te Sëlva. Tla Val Badia ie la sënta prinzipela a La Ila, ma la lezions vën nce tenides a La Val, a San Martin y a Al Plan.
as
