Laûr | 05.11.2012 | 15:04

Jonta provinziela: se adaté al marcià dl lëur

USP – Tla Provinzia de Bulsan iel belau 8000 persones zënza y la cuota ie ultimamënter cresciuda al 3,7%. La Jonta provinziela se à te si senteda (da NCUEI) dl 05 de nuvëmber dat ju cun pruvedimënc per tenì permez a chësc trend y acioche de plu jënt ruve nsci pra na stiera. Chi che ie zënza lëur messerà azeté cie che ti vën cunsià dal ufize dl lëur y nsci se adaté mo de plu al marcià dl lëur.

Aldò dl regulamënt che la Jonta provinziela à dat pro n cont dla mediazion de stieres muessa chëi che ie zënza lëur nce vester desposć a pië do cie che ti vën pità y cunsià. Chi che se damanda n sustëni tres l ufize provinziel per l lëur messerà sotscrì che l azeta nce i pruvedimënc che ti unirà cunsiei. Sëuraprò a purté la documentazions de lëur y se lascé nuté su tl ufize dl lëur, muessa chiche chier da lëur nce se ancunté cun patrons de lëur, fé cursc y - sce l ie l cajo, nce mparé rujenedes.

Tl Südtirol ie unì cumpedà 7.740 persones zënza lëur. Plu de mec, 4023 persones, possa riesc tò su na stiera nueva. I autri 3717 ie jënt cun na cualifica plu auta per chëi che l ne ie nia tan saurì da abiné na stiera nueva. Te chësta cumpëides iel nce chiche lëura la sajons. Da pert dla Provinzia vëniel nsci azetà nchin a trëi mënsc zënza lëur. Pra chëi che ne à te chësc tëmp nia abinà na stiera, uniral cialà do plu avisa ciuldì che i ne à nia abinà na stiera y ciun pruvedimënc che ne à nia purtà fruc.

"Per abiné na stiera vëniel nce damandà plu flessibltà n cont de livel de lëur y la destanza da cësa" à dit l presidënt Luis Durnwalder do la senteda dla Jonta. Chiche chier la lëur muessa azeté na stiera che vede a una cun si furmazion nce sce l davania nchin a 25% de manco. (Chësta sëida fova dant me 10% de manco). Nce n cont de furné al lëur vëniel damandà de se adaté de plu. Nchinamò messovel unì azetà na stiera daujin al luech de residënza, tl daunì iel unì metù na sëida de 50 chilometri y nchin a 80 menuc de viac. Chisc criteries vel per i prim trëi mënsc zënza lëur. Chi che ne à te chësc tëmp nia abinà na stiera muessa vester despost a pië do na stiera te dut l raion provinziel azetan nce de durmì demez da cësa. Per genitores iel sun chësc pont udù dant ezezions.

N cont de cuntribuc finanziei per chëi che ie zënza lëur à la Provinzia daniëura metù a desposizion passa 25.000 euro. Davia che l ne ie for de plu zënza lëur, iel de bujën che chisc cuntribuc vën dai ora aldò dla desposizion dla jënt de pië do stieres.

"Sce da una pert iel belau 8.000 persones zënza lëur, iel dal'autra pert feter 8000 stieres da garat, me che chëi zënza lëur ne à nia la cundizions da pië do la stieres" à spiegà l Presidënt dla Provinzia te cunferënza stampa. La relazion dl marcià dl lëur mostra su che l ie for de plu sëura 50 ani che ne à nia da lëur. Per ti jì ancontra a chësta problematica se mpënia la Jonta provinziela de lauré ora pruvedimënc de svilup y tueda, per l export, mpulsc tla mpustazion dla chëutes y cun miuramënc tl'aministrazion publica. Sëuraprò a chisc ciamps de ntervënt plu generei uel i assessëures provinziei mëter a jì miuramënc n cont de pruvedimënc per lauranc sëura 50 ani, persones cun handicap, cunsulënza a crì la furmazion plu adateda, cualificazions y stieres de livel plu aut. "Studi desmostra che cun nvestizions tl parch tecnologich de 28 milion de euro al ann iel mesun arjonjer da 3500 nchin a 8500 stieres al ann" à dit Durnwalder.

Per l 2020 iel udù danora che tl Südtirol saral me plu 15% dla stieres per jënt cun puecia furmazion. 50% de duta la stieres sarà te ufize, cumerz o laurazion, ntan che l 25% ie udù danora tl ciamp scientifich y 10% tl management.

La basa per truep pruvedimënc publics ie n plann provinziel dl lëur per n tëmp de set ani. L plan autel va mo nchin ala fin dl 2013. Per via dla situazion atuela à la Jonta provinziela dat pro de scumencé riesc a lauré ora chësc plann da nuef se tulan dan dl avëi anjenià d'ansciuda 2013.

as