Atualità
Sustëni provinziel per mo 14 films
USP – 14 produzions de films giaterà n sustëni dala Provinzia. Chësta dezijion à la Jonta provinziela tëut do che l fova unì mandà ite la dumandes per la terza pert dl sustëni finanziel. Cun chësc pruvedimënt vëniel dat n sustëni a produtëures y atëures da tlo, arjunjan nce che l Südtirol sibe for inò da udëi te films.
Cun la terza pert dla dumandes per n sustëni à la cumiscion film dla sozietà BLS (Business Location Südtirol) fat la pruposta de sustenì mo 28 films documenteres y fiction. I assessëures provinziei ne n à azetà 14 cun na soma de 1,418 milion de euro. Danterauter uniral sustenì na coproduzion taliana-austriaca-svizra, cater coproduzions tl raion de rujeneda tudëscia y doi nternaziuneles. De ndut iel udù dant 84 dis de lëur tl Südtirol cun n custimënt de passa 2 milion de euro che resta tl Südtirol.
L sustëni dla Provinzia vën dat per pec tëuc su te raions dl Südtirol che ie da cunëscer (730.000 euro) dla produzions Unter Null, Lucy in the Sky, Ice Man, Tirollar, streng geheim (tituli provisories). Danter i proiec per sustenì i jëuni da tlo y la firmes dl Südtirol (sustenì cun 608.000 euro) iel: There is only one you, I want to see the manager, Wie ich Dich liebe Rätselleben, La mia amica Greta, Walking in the Dark, Roots & Wings, Spiral, Fräulein y Fluss ohne Ufer. Na terza pert dla sustëni dat pro dala Jonta provinziela (80.000 euro) ti va al documeter cun referimënt al Südtirol "Die Blutspur der Medici".
as
