Atualità
Sëres de consulënza por do la scora mesana inće tla Val Badia
USP – I geniturs é les porsones de referimënt plü importantes canche ara se trata da chirì fora le tru de formaziun do la scora mesana. Por sostignì i geniturs y i educadus pîta l’Ofize provinzial Orientamënt scolastich y profescional dal 12 de novëmber inant n valgönes sëres de consulënza. De dezëmber vëgnel inće pité na sëra por ladin a San Martin y a La Ila
Pro les sëres de consulënza ciafa i geniturs informaziuns menüdes sön les poscibilitês de formaziun y profescionales do la scora mesana a na moda da ester informà y da ester bugn da acompagné sü mituns y sües mitans por ći che reverda la lîta dla formaziun y dla profesciun. L'aconsiadù profescional Hannes Reichegger dl Ofize Orientamënt scolastich y profescional da Bornech informëia i geniturs sön les ofertes y les novitês tl monn dla scora tl Südtirol y mostra co s'anuzé dla infoteca y dla banca dać on-line che alda laprò (www.provinz.bz.it/berufsberatung). Implü nen jaràra pro la manifestaziun de consulënza de coche an po sostignì i mituns y les mitans da tó chësta dezijiun tan importanta. Les sëres de consulënza é debann, mo an mëss se prenotè pro l'Ofize Orientamënt scolastich y profescional da Bornech (tel.: 0474 582381, www.provinz.bz.it/berufsberatung o berufsberatung.bruneck@provinz.bz.it) la jöbia dan le terminn.
Les sëres de consulënza é ai 12 de novëmber y ai 10 de dezëmber dl 2012, ai 14 de jenà, ai 11 de forà y ai 11 de merz dl 2013 dales 19.00 ales 20.30 tla infoteca dl Ofize Orientamënt scolastich y profescional da Bornech sön la plaza de comun n. 10.
Implü él inće dui terminns por i geniturs ladins, y plü avisa en mercui, ai 5 de dezëmber tl salf di stödafüch a San Martin de Tor y en mercui, ai 12 de dezëmbertla scora mesana da La Ila dales 20 ales 21.30 cun l'aconsiadëssa profescionala Marlene Irsara. Te chësc caje mësson inće se prenotè pro l'Ofize Orientamënt scolastich y profescional da Bornech, y plü avisa ćina le lönesc dan la sëra de consulënza.
Sot le slogan "Descurì i trus do la scora mesana" pita l'Ofize Orientamënt scolastich y profescional da Bornech ai 15 de novëmber, ai 13 de dezëmber y ai 14 de forà jöbies d'informaziun lunges, olache la infoteca é daverta ćina les 7 da sëra. I geniturs y sü mituns po ti ćiarè deboriada al material sön les poscibilitês de formaziun desvalies do la scora mesana.
usp
