Atualità
Comunità per la ferata dl Prëner: Durnwalder dà inant a Platter
USP – Deberieda cun l coodinadëur UE per l culegamënt Berlin-Palermo Pax Cox, se anconta n merdi 13 de nuvëmber la comunità per la ferata dl Prëner per fé l pont di lëures de mudernisazion dla linia. Ntan chësta ancunteda a Bulsan dajerà Luis Durnwalder inant la presidënza al colega dl Tirol, Günther Platter.
Tla comunità per la ferata dl Prëner vëniel dantaprima laurà sun la problematiches dl muvimënt dla ferata sun la linia dl Prëner cun danora l tunel de basa y la linies da ti ruvé permez. Cumëmbri dla Comunità ie la Provinzies y i Länder sun chësta linia danter Minca y Verona: Bayern, Tirol, la Provinzies de Bulsan, Trënt y Verona, deberieda cun la Majon de cumerz de Minca, Dispruch, Bulsan, Trënt y Verona.
I presidënc dla Provinzies de chësta comunità se anconta n merdi 13 de nuvëmber a Bulsan per fé l pont sun l jì inant di lëures per l tunel dl Prëner deberieda cun l cuordinadëur UE Pat Cox. Al orden dl di, iel do l salut dl presidënt Durnwalder, l ntervënt de Cox, n ajurnamënt n cont dla linies de ruvé permez al tunel (da nord tl Unterinntal, l tunel dl Prëner y da sud) y na valutazion dla situazion economica ntan i lëures.
Te chësta senteda iel nce udù dant che Luis Durnwalder dajerà inant la presidënza a si colega dl Tirol Günther Platter. L'ancunteda n merdi ai 13 de nuvëmber scumëncia dala cater domesdì tla sënta dla Majon de Cumerz a Bulsan y ie prugrameda nchin la sies da sëira.
as
