Atualità
Sculeies mpera a cunëscer l Istitut tecnich Raetia
USP – L crì ora dla scola auta plu adateda da fé do la scola mesana ie na dezijion mpurtanta per i jëuni y si families. L Istitut tecnich Raetia de Urtijëi prejënta si particulariteies cun n danmesdì de workshop per sculeies dla scoles mesanes de Gherdëina.
N merdi ai 13 de nuvëmber puderà i sculeies dla scola mesana de Sëlva y S.Crestina mparé a cunëscer l Istitut tecnich a Urtijëi. Dut l danmesdì vëniel te grupes de lëur pità ucajion de udëi sce ti savëssa bel a fé na scola auta tl ciamp dl cumerz o dl turism cun de plu rujenedes.
Ai sculeies dla scola mesana de Urtijëi ti uniral pona l'ena do, n lunesc ai 19 de nuvëmber ënghe pità n tel danmesdì te chël che i possa udëi coche ti savëssa a fé chësta scola.
La dezijion dla streda da tò do la scola mesana muessa vester na dezijion madura y nsci uniral ai 21 de fauré mo pità n di dla porta davierta per duc, ulache nce i genitores posse mparé a cunëscer miec l nseniamënt che pieta l Istitut tecnich Raetia a Urtijëi.
Plata web dl Istitut tecnich Raetia: www.iteraetia.it
as
