Atualità
Jonta provinziela azetea de fé trëi uties da mont da nuef
USP – Do l bënsté dla Cumiscion provinziela per la cuntreda y la Cunsulta alpinistica à la Jonta provinziela (NCUEI) ai 12 de nuvëmber dat pro i proiec per fé da nuef la trëi uties Weiskugel/Pio XI, Schwarzenstein/Vittorio Veneto al Sasso nero y Edelraut/Ponte di Ghiaccio.
Canche l ie de bujën de zaré ju y fé su da nuef na utia da mont iel udù dant che la Jonta provinziela debe si bënsté acioche l chemun de referimënt posse dé la cunzescion da frabiché. La Jonta tol si dezijion sun la basa dla valutazion da pert dla Cumiscion provinziela per la cuntreda y dla Cunsulta alpinistica. Śën iela stata tan inant che la Jonta provinziela à dat si bënsté per la uties Weiskugel/Pio XI tla Venuesta, Schwarzenstein/Vittorio Veneto al Sasso nero y Edelraut/Ponte di Ghiaccio, tramedoves te Puster.
Sëuraprò ala funzion che la utia à daniëura abù de pité sosta per i alpinisć, vëniel al didancuei bele tla proietazion tenì cont de stravardé l ambient tl frabiché y pona tla gestion. "Aldò di esperc respetea i trëi proiec nueves drët bën chësta doi funzions, pitan nce soluzions adatedes n cont dl'energia" à dit l presidënt Luis Durnwalder.
La Cunsulta alplinistica ie metuda adum da reprejentanc dl CAI y AVS, di Judacrëp, di mëinacrëp, di maestri de schi, dla lia di osć HGV, dla lies turistiches, dl'assoziazion di paures y dla repartizion provinziela per l turism y la cuntreda.
Nce sce i proiec ie dai pro, ne iel mo nia unì segurà l scumence di lëures, che depënd dla despunibltà finanziera dl'aministrazion publica.
as
