Atualità
Regules nueves per i cuntribuc al fit dl cuatier
USP – Dal prim de jené 2013 unirà i cuntribuc per paië l fit dl cuatier dai ora a na maniera nueva. La doi sortes de sustëni da nchinamò, l cuntribut per l cuatier tres l IPES y l cuntribut tres i servijes soziei, unirà metui adum te n sëul cuntribut. Chësc mëter adum se à damandà criteries nueves che ie (NCUEI) ai 12 de nuvëmber unic dai pro dala Jonta provinziela sun pruposta dl assessëur Richard Theiner.
31,8 milion de euro à l IPES ntan l ann passà paià ora de cuntribuc per l cuatier y 11,1 milion ie unì paià ora dai servijes soziei per l fit dl cuatier. Per l daunì iel unì metù adum chisc doi cuntribuc che unirà paiei ora tres i servijes soziei. "A chësta maniera vëniel nce schivà de mussei fé dumanda te doi lueges" spiega l assessëur Richard Theiner.
Do che l Cunsëi provinziel ova bele dat pro chësta unificazion per l ann 2013 à la Jonta provinziela śën dat pro i criteries nueves. Per pité na mudazion plu mujela iel udù dant na fasa transitoria per chiche à nchinamò giapà n cuntribut per l cuatier. Chiche à n cuntrat registrà y giata n cuntribut per l fit dl cuatier, l giaterà mo inant dal IPES ala medema cundizions nchin che ne ti toma nia l cuntrat y nchin al plu te cater ani. Cuntrac de afit nueves unirà me plu tëuc su dai servijes soziei.
Per giapé n cuntribut al fit dl cuatier, iel de bujen de n cuntrat registrà. La sëides mascimes dl fit ie unides dates pro dala Jonta provinziela aldò dla grandëza dla familia y dl chemun (cëla tabela junteda pro). L cuntribut ne ie nia udù dant per chiche ne à nia i criteries aldò y per chiche à genitores patrons de n segondo cuatier ulache vif nia parënc plu strënc. Per zitadins nia comuniteres vëniel damandà cin ani de residënza.
L dërt de n cuntribut per l fit o per l cuatier depënt dala situazion de davani dla familia valuteda aldò dl sistem de avëi y davani (DURP/EEVE), a na maniera de garantì n sustëni a chiche à veramënter de bujën. "Permez a coche la ie stata nchinamò possel vester zitadins che giata de plu y nce de tei che giaterà de manco. De ndut an cialà de fé regules valivedes ora che tën cont de chisc tëmps" spiega Theiner.
as
