Desvalì | 19.11.2012 | 15:46

Jonta provinziela ejaminea i cuntrac SEL

USP – I cuntrac de lëur danter la SEL y si diretëur generel da dant Maximilian Rainer ie (NCUEI) ai 19 de nuvëmber unic ejaminei dala Jonta provinziela che à dat pro che l ne dëssa nia unì paià ora vel pertendudes de pesć sun l davani dla sozietà. Sun pruposta dl assessëur Mussner iel unì trat de reviers la cunzescion per fé strom dla sozietà “Stein an Stein”.

Per l prim iede à la Jonta provinziela cialà tres i cuntrac de lëur dla SEL cun Maximilian Rainer. "Nes on duc fat marueia dla bona cundizion che i respunsabli dla SEL ti à cunzedù a Rainer, nce vel cundizion che do nosta minonga ne ie nia da azeté" à dit l presidënt dla Provinzia Luis Durnwalder do la senteda dla Jonta. Chësc ne reverda nia l prim cuntrat de lëur che fova dl 2002 unì sotscrì dal presidënt da ntlëuta Michl Laimer. Tlo fovel unì fat ora n paiamënt netto de 4.131 euro al mëns y vel pertes sëuraprò sciche zënza (per ejëmpl l rembursamënt aldò di chilometri). "Chësc cuntrat ie sun l medemo livel di diretëures tla Provinzia y do nosta minonga a post" à dit l presidënt dla provinzia.

Dl 2008 iel pona unì marciadà ora na njonta al prim cuntrat de lëur, sotscrita dal presidënt dla SEL Klaus Stocker y Rainer. Aldò de Durnwalder iel tlo udù dant n paiamënt de basa per 205.000 euro al ann. Leprò mo na partezipazion al davani dla SEL (dan la chëutes) aldò che l ie unissa arjont i fins metui dant dal cunsëi de aministrazion. "Sce l vën arjont i fins dasessël unì paià ora un n percënt, sce nia pona mo for 0,75%" à spiegà Durnwalder che ne azeta nia l pest per fins nia arjonc.

I assessëures à nce dat pro che l dëssa unì cialà do duc i cuntrac cun i aministradëures dla sozieteies provinzieles. "Sciche ndicazion de basa dëssa valëi la delibra dl 2010 che dij de adaté i paiamënc dla sozieteies provinzieles a chëi di diretëures tl'aministrazion provinziela" à dit Durnwalder.

Tl cuntest dl scandul di aministradëures da dant dla SEL, à l assessëur al'energia Florian Mussner fat al savëi a si coleghes de Jonta che la cunzescion dal'ega per fé strom che la Provinzia ova sëurandat ala sozietà "Stein an Stein" ie unida trata de reviers.

La Jonta provinziela à nciarià si reprejentanc tl cunsëi de aministrazion dla SEL de cherdé ite na reunion generela per delibré de tò ju i aministradëures dla SEL da dant.

as