Atualità
200.000 cudejiei per nfurmé i turisć dl’Autonomia
USP – Sies milion de turisć vën ann per ann a fé feries tl Südtirol. Ajache chësta jënt à daniëura nce dumandes de politica y de cumenanza, che ne ie nia for saurì da respuender, à la Jonta provinziela lascià stampé 200.000 cudejiei de nfurmazion. L presidënt dla Provinzia à (NCUEI) ai 19 de nuvëmber fat al savëi che i cudejiei unirà menei ora a duta la lies turistiches mo dan che scumëncia la sajon da inviern.
L Südtirol te 32 plates cun truepa grafiches y puech test: chësc ie chël che la Jonta provinziela à lascià anjenië per chiche vën tlo da nëus a passé si feries y per ti prejenté nsci l raion y la jënt. Tl cudejel "Das ist Südtirol", per talian " Piacere Alto Adige" y per nglëisc "This ist South Tyrol" vëniel dant a prima dat respostes. "I turisć fej for inò la medema dumandes: ciuldì ie pa la tofles sun streda te doi y trëi rujenedes, ciuldì vëniel pa rujenà tudësch y ladin, y ciuldì iel pa unì sentà tan de mëiles. I cudejel respuend a de tel dumandes te na maniera curta, ma nia banala, prejentan la particulariteies de nosc raion" à dit l presidënt Luis Durnwalder canche l à prejentà la cudejel riesc do la senteda dla Jonta provinziela.
Tl cunzet dl cudejel à l Servisc de comunicazion ulù lascé demez fotografies se stizan defin sun grafiches de nfurmazion che dëssa bele te na prima udleda spieghé culegamënc. Te cin capituli possen mparé a cunëscer la nfurmazion de basa sun la cumenanza dla provinzia de Bulsan, l cunviver dla trëi grupes de rujeneda, la storia dl raion do la prima gran viera, l'Autonomia y l bilanz provinziel.
L presidënt Durnwalder à spiegà che l ie unì stampà 200.000 copies spartides tla verscion per tudësch, talian y nglëisc. Ntan i proscimi dis uniral scumencià la spartizion ala lies turistiches, ai museums y la cëses di parcs naturei.
L custimënt ie de feter 40.000 euro, ma la lies turistiches y la cëses che pieta albierch giata l cudejel debant. "Tres la lies turistiches y i hotiei arjunjons gran pert di turisć che vën da nëus y chësc cun n custimënt giustificà" nscì la minonga dl presidënt dla Provinzia.
L cudejel ie da giapé tla lia turistica dl luech o diretamënter pra l Servisc de comunicazion dla Jonta provinziela (plaza Silvius Magnago 1 a Bulsan, usp@provinzia.bz.it). L cudejel ie nce da pudëi giapé tres internet (www.provinz.bz.it/729212/de/broschuere.asp).
as
