Atualità
27 de nuvëmber per udëi nstës l Lizeum y la Scola Prufesciunela
USP – N merdi ai 27 de nuvëmber mostra l Lizeum d’Ert y la Scola prufesciunela per l artejanat artistich si lëures, nstalazions, teatri, esperimënc, fotos y video dedichei ala mujiga. Ntan chësc di dla porta davierta puderà sculeies dla mesana, si genitores y duc i nteressei nstës udëi cie che n possa mparé te chësta doi scoles autes a Urtijëi.
N possa mparé ert y mujiga, n possa mparé a na maniera tradiziunela y nce cun ideies inuvatives. Ma sce n ie boni de mëter adum la doi pertes, mëter a jì culegamënc danter formes, culëures y meludies vëniel a lum lëures de marueia. Pra l di dla porta davierta puderan nstës mparé a cunëscer y viver cie che pieta la scoles autes de Gherdëina dedichedes al ciamp artistich te duta si creatività. Ntan chësc di dedicà ala mujiga y al'ert puderan udëi n prugram che prejënta fisica y mujiga, la ciantia ladina, dessënies y pitures, tesc' criatifs, video, bodypainting, fotografia, teater y mo truep d'auter.
La culaburazion danter l Lizeum d'Ert y la Scola de Mujiga à nce judà pro che i sculeies ie stai boni de ti dé na esprescion particulera a si pec, ëi à crià velch de plu, che ie te nosc tëmps tan de bujën per se deriejer tl marcià dl lëur.
N majer pëis ala pert pratica ti uniral ai 27 de nuvëmber dat tla Scola prufesciunela per l artejanat artistich. L unirà tlo pità ucajion de udëi co che l vën laurà tla berstotes da mudelé, da ziplé, de dessëni y depënjer, ma nchinamei al lauré mitei sciche l arjënt y l or.
"Ntan l di dla porta davierta possa sculeies dla mesana y si genitores nstës udëi cie che i majeri sculeies mpera te chësta scoles y nsci pitons ucajion che i possa se udëi ora la scola plu adateda a si cualiteies" spiega la diretëura Elisabeth Baur.
L Lizeum d'Ert y la Scola prufesciunela gëura ai 27 de nuvëmber si portes a duc i nteressei dala 9.00 y ala 12.00 y pona dala 14.00 nchin la 16.00. Vijites cumpaniedes vën pitedes dala 9.00, dala 10.30, dala 14.00 y dala 15.00.
Di dla porta davierta dl Lizeum d'Ert y la Scola Prufesciunela per l artejanat artistich "Cademia" tl web sot a www.cademia.it
as
