Atualità

Frabiché | 20.11.2012 | 15:53

Sustëni per l cuatier: 400 ressanamënc, sëurandata cun 25 ponc y categuria mesana

USP – Cun l ressanamënt de 400 cuatieres al ann uel l departimënt dl frabiché abitatif y l Istitut per cuatieres soziei IPES avëi tant’ de cuatieres a desposizion da pudëi i sëurandé a chiche à nce me 25 ponc. Sëuraprò vëniel laurà per mëter a desposizion cuatieres al categuria de davani mesan. Chësc ie unì prejentà dal assessëur Tommasini y dal presidënt dl IPES Pfitscher (NCUEI) ai 20 de nuvëmber a Bulsan.

Cun feter 13.200 cuatieres te dut Südtirol possa l IPES curì l bujën de albierch nce per chëi che ne ie nia boni se l paië. Chësc avëi ie majera pert unì adum tres frabiché da nuef, ma śën dëssel unì dat majer pëis al ressanamënt de cuatieres che ie bele. "A chësta maniera sparanions grunt y pudon sëurandé i cuatieres plu debota" à dit l assessëur Christian Tommasini. Chësta mira à l presidënt dl IPES Konrad Pfitscher prejentà cun zifres: nchinamò fova la relazion danter cuatieres nueves y cuatieres ressanei 50 a 50, tl daunì dëssa i cuatieres ressanei jì su al 75 percënt.

Per arjonjer chësta mira dëssel damòinla unì ressanà y sëurandat 400 cuatieres al ann. "A chësta maniera pudons ruvé tan inant da sëurandé n cuatier a duc chëi che à damandà y à amanca 25 ponc" à dit l assessëur. Te chësc mumënt ie feter 450 cuatieres uec davia che n aspieta sun l ressanamënt. Chësc fej ora l 3,5 percënt, ie plu bas che te d'autri raions y dëssa ti ani che vën mo unì smendrì.

L'atività dl IPES ie ruveda a n pont da mussei unì diversificheda. L dëssa mo unì frabicà cuatieres nueves (i programs atuei tol ite 340 cuatieres te 34 chemuns), l unirà cumprà cuatieres (atualmënter 59 cuatieres te sies chemuns) y leprò dëssel mo unì fat ressanamënc. Per cumedé ca i vedli cuatieres iel unì scrì ora 20 cuncorsc per n custimënt de 11 milion de euro.

Per l 2013 se à l assessëur provinziel per i cuatieres nce tëut dant de mëter a desposizion cuatieres per la categuria de davani mesan. Na majera pert reverda tlo Bulsan ulache l ie bele unì sëurandata 60 cuatieres per n tëmp de 10 ani y nchin n auter ann uniral mo do 40 cuatieres. Cun l model de cumpré a rates uniral nchin dl 2015-16 fat 220 cuatieres a Bulsan, 7 a Ciastel, 12 a Aurer, 13 a Eppan y 10 a Urtijëi.