Atualità
Grupa dl' Euregio à prugramà si segondo ann de atività
USP – Danter la prioriteies che la grupa europea de culaburazion teritoriela (GECT/EVTZ) à (NCUEI) ai 20 de nuvëmber fat ora te si senteda a Bulsan iel nce proiec sozio-saniteres cun referimënt ala jënt de tëmp, scumenciadives de cooperazion, mubilità y la prima edizion dl camp da instà-EUREGIO per sculeies dla scoles mesanes. La grupa metuda adum dala provinzies de Trënt, Bulsan y Tirol à tl palaz Widmann a Bulsan tenì si senteda de jonta y reunion generela cun i presidënc Luis Durnwalder, Lorenzo Dellai y Günther Platter.
Tla reunion dla grupa europea de culaburazion teritoriela (GECT/EVTZ) iel unì dat pro la relazion sun l'atività 2012 y la previjion de bilanz per n auter ann cun na soma de feter 470.000 euro. Chësc bilanz vën curì dala trëi provinzies, dala Union europea n cont de proiec azetei y dala Region.
Do l prim an de atività dla grupa de culaburazion nasciuda dal'Euregio, iel unì fat n bilanz positif n cont de culaburazion dla trëi provinzies, "na culaburazion de pitli vares, che ne se à nia fermà" à dit Luis Durnwalder ai media.
A livel politich cialerà l'Euregio avisa ala scumenciadiva dla macroregion alpina, che dëssa aldò dl GECT/EVTZ daniëura dé l majer pëis ai problems di raions da mont, al mpëi de spusté l muvimënt sëura l Prëner dala streda ala ferata y, sciche à sorissà l presidënt Platter, de abiné n priesc uniter per l daz dl'autostredes.
Per l 2013 vëniel dat pëis al ciamp sozio-saniter (particularmënter per la jënt de tëmp), la cooperazion, la mubilità, la tecnologies vërdes y la furmazion di jëuni. Danter la nuviteies iel n camp da instà Euregio per sculeies dla scoles mesanes per fé pratica de rujeneda. L cuncors per grupes jëunes de mujiga Upload unirà d'ansciuda inò metù a jì te na edizion nueva. Sun l program da n auter ann iel nce proiec che reveda la cooperazion scolastica, l barat de nsenianc. La grupa europea de culaburazion teritoriela uel nce nvië via sinergies nueves tl ciamp dla radioterapia y n cunvëni sun cuestions giuridiches de mubilità di pazienc. Tl 2013 unirà danter auter inò metù a jì l festival Euregio di jëuni. Ala fin dla reunion generela à Kevin Senoner dl Lizeum d'Ert de Urtijëi, a inuem di partezipanc ladins, cuntà dl'esperienza dl festival da chëst ann danter Dispruch, Bulsan y Trënt. Ntan trëi dis à i sculeies fat de plu proiec per abiné formes de culaburazion danter i jëuni dla trëi provinzies.
Do la reunion à i presidënc de provinzia Luis Durnwalder, Lorenzo Dellai y Günther Platter prejentà n liber nuef sun la storia dla region europea. Te chësc liber vëniel sun 260 plates prejentà n cheder generel dal tëmp de Ötzi nchin ala fundazion dla grupa europea de culaburazion teritoriela (GECT/EVTZ). Tres l lëur de storics dla trëi provinzies possen ti jì plu sot ala ravises storiches che l Tirol, l Südtirol y l Trentin à deberieda. Tlo vëniel ne mustrà su i raporc da plu da giut per ruvé ala formes atueles de autonomia, cunvivënza y culaburazion sëura la sëides.
as
Galaria dales fotografies
