Atualità
Mostra di chelneri ai 4 de dezëmber te Sëlva
USP – N merdi ai 4 de dezëmber gëura tl Tublà da Nives te Sëlva la mostra dedicheda al mestier dl chelner. Chësta mostra dal titul “Cie ëis’a gën? Sie wünschen? Desidera?” ie unida a se l dé te na culaburazion danter l Touriseum che à fat la mostra, l Museum Ladin Ćiastel de Tor y la lia culturela Tublà da Nives.
La mostra pieta na vijion dl svilup storich dl mestier da chelner y chelnera, de si cundizion de vester y de la defrënta posizions dl personal de servisc. Dut chësc vën prejentà te na forma moderna interativa. Chësta mostra fova l ann passà unida fata dal Touriseum de Maran y sarà da n merdi 4 de dezëmber da udëi te Sëlva. La giaurida ie prugrameda per la sies da sëira tl zënter per manifestazions cultureles Tublà da Nives. Te chësta ucajion unirà nce adalerch l diretëur dl Touriseum Paul Rösch, l diretëur dl Museum Ladin Ćiastel de Tor Stefan Planker deberieda cun l presidënt y l respunsabl culturel dla lia Tublà da Nives Vinzenz Senoner y Leo Senoner. L patron de cësa sarà te chësc cajo l ambolt de Sëlva Peter Mussner.
La mostra ie unida purteda te Sëlva cun l pensier de fé pensé sun chësc mestier mpurtant per n zënter turistich sciche Gherdëina. Tl mostra ne vëniel nia me prejentà la storia, ma nce problems de vester y la cundizions soziela sciche i orars de lëur, i paiamënc y la gran spustamënt de chelneres y chelneri. Cuer dla mostra ie l raport danter la figura dl chelner y l tlient cun referimënt particuler a la comunicazion danter chiche servësc y chiche vën servì. Propi te chësc cuntest prejënta la mostra nstëssa si cuntenuc zënza de gran tesć, ma plu che auter cun proiezions de filmac. Pert dla mostra ie nce dedicheda ala furmazion dl personal spezialisà tl tëmp di grand hotel.
La mostra "Cie ëis'a gën? Sie wünschen? Desidera?" sarà da udëi dala dumënia al vënderdi, dala 10 ala 12 danmesdì y dala 5 ala 7 domesdì, nchin ai prim de auril.
---
Culaburadëures di media ie nviei ala giaurida n merdi ai 4 de dezëmber, dala 18.00 tl Tublà da Nives te Sëlva y de cunedì dla mostra.
as
