Atualità
Uneranzes per l ulentariat: doves ti luesc ladins
USP – N ucajion dl di nternaziunel dl ulentariat, ai prim de dezëmber, ie set ulenteres unic unerei per si merit a inuem dla gran cumpëida de ulenteres te duta la provinzia de Bulsan. Danter chisc nce Valentin Erlacher y Otto Senoner. La uneranzes ie unides sëurandates dal presidënt dla Provinzia Luis Durnwalder che à sorissà la mpurtanza de sustenì l ulentariat che ie de gran valor per la populazion.
Otto Senoner (lia tët per la defendura dl ambient) y Valentin Erlacher (Sorvisc ai Jogn dla Val Badia) ie unic unerei deberieda cun Mariangela Berlanda (Krebshilfe), Annemarie Schilcher (Frauen helfen Frauen), Michael Hilpold (Volontarius), Hannes Waldner (Jugendring) y Silvia Caruso ("Il melograno") tla cësa da cunzert "Joseph Hayden" a Bulsan.
"La cumenanza à arjont chësc livel dal didancuei cun l aiut dl ulentariat y ncuei ne pudons nia plu se nmanginé de vester zënza. Per recunëscer l mpëni ulenter de tan de persones ulons n l di dl ulentariat de pëis al mpëni ulenter a bën de autri." À dit l presidënt Durnwalder pra la sëurandata dla uneranzes.
Chësta iede an pra l di dl ulentariat ulù auzé ora l ciamp soziel y la sfides per l ulentariat. Sun la dumandes dl moderatëur Markus Frings à l presidënt dla Provinzia dit che l ulentariat fej da stiza ala cumenanza. L ie i ulenteres che lëura cun i mëndri tla lies dal sport, che leva de nuet canche l vën cherdà i destudafuech o i judacrëp, che sëurantol na gran pert dla cura dla jënt a chëla che la ne ti va nia bona. Ma nce tl ciamp culturel ie i ulenteres che tën su la tradizions y usanzes tan de mpurtanza.
Dan an na sala plëina de jënt iel nce unì lecurdà dla lege nueva per ngrandì i servijes ulenteres che dëssa jì n droa a dis. Chësta dëssa lascé pro che jënt de tëmp y jëuni posse mo de plu zapé ite tl ciamp non-profit. L servisc soziel ulenter unirà slungià a 32 mënsc, ntan che l servisc zevil ulenter y l servisc nuef per feries de sculeies unirà ntegrei tla urganisazions che lëura zënza prufit. Te chisc tëmps de sparani à Durnwalder respundù che l vën cialà de fé dut l puscibl per paië i servijes che vën ncuei fai dai ulenteres y che mesessa unì sëurantëuc dala man publica, sce i ëssa da tumé ora.
I set reprejentanc di ulenteres ie unic cris ora sun pruposta dla lies che fej pert dl reghister provinziel dla urganisazion y dla cumiscion de vigilanza dl'atività de ulentariat. La dezijion definitiva ie unida tëuta dala Jonta provinziela.
Otto Senoner da Vastlé
Nasciù l ann 1926 te Sëlva, se al cun 17 ani dedicà al arpizeda y ie pona stat fundadëur di Catores y di Judacrëp de Gherdëina. Canche l ie ruvà de reviers da Milan ulache l fova stat per lëur, se al mpenià a mëter su l aiut di crëps cun l julier che ie pona deventà l Aiut Alpin. L ann 2008 iel stat cumëmber de fundazion dla scumenciadiva "Pro Mont de Sëuc", de chëla che l ie stat presidënt dal 2009 al 2011.
Valentin Erlacher
Nasciù dl 1987, vif a Mareo y, nce sce nstës mo jëunn, se al bele truep ani dat ca per la grupa di jëuni de Mareo y per i jëuni dl decanat dla val Badia. Dl 2010 iel nce unì lità presidënt dl Sorvisc ai Jogn dla val Badia.
as
Galaria dales fotografies
