Atualità
Pinzimonio Vocale pro l’“Advënt ladin”
USP – Pro le conzert d’Advënt di grups ladins tl Dom de Balsan darà l’ensemble Pinzimonio Vocale dla Val Badia n contribut particolar. Deboriada cun ćiamò cin d’atri grups ćiantarài ai 14 de dezëmber por ti presentè al publich de Balsan la particolarité culturala ladina da ćiantè l’Advënt. Cun chësc conzert gnaràl inće pité na ocajiun de incuntada danter les cultures.
Ai ne po nia le strité jö che ai é n pü' particolars, al po ester inće n pü' mać, i cin musizisć dla Val Badia che ti à dé a so ensemble l'inom de n antipast y ortam talian. Renfrescant, val' iade n pü' ante y sarè, spo indô morjel y duc, mo dantadöt da corusc y multilateral, insciö é "Pinzimonio". Rodunt chësta varieté s'à l'ensemble metü sciöche fin, canche ai l'à metü sö dl 2006.
La pasciun por la musiga i à condüt adöm; Gudrun Mayrl, Irene Clara, Elisabeth Fistill, Renzo Huber y Raimund Pitscheider é musicalmënter atifs ti ćiamps plü desvalis.
I madrigai de Monteverdi à afasciné particolarmënter i cin ćiantadus y la moteta Jesu, meine Freude de Johann Sebastian Bach alda pro les operes che ti plej le plü al ensemble.
Cun le ćiantè y fà musiga deboriada s' àl svilupé dante i cin ćiantadus n'amizizia dër sota. I conzerć y inće tröpes proes é por vignun na merscia musicala, mo inće avenimënć de gran amizizia acompagnà da momënć ligherzins y manco, dübi, risch y tenjiun, critica y lalt, confidënza y lascè ia...
Deboriada cun ćiamò d'atri grups ladins ćiantarà le Pinzimonio Vocale ai 14 de dezëmber sön invit dl Assessorat provinzial ladin dales sis da sëra tl Dom de Balsan.
Avënt ladin a Bulsan: l cunzert y la grupes
as
