Atualità
www.provinzia.bz.it, la plata de nfurmazion ladina ie online
USP – Aministrazion publica, nutizies, servijes y banches dac te na forma inuvativa y zënza papier: La Rë zivica dla Provinzia de Bulsan à ti ultimi ani arjont na gran popularità. (NCUEI) ai 5 de dezëmber à l assessëur Florian Mussner metù online la verscion per ladin. Deberieda cun nfurmazion d’uni sort vëniel per l prim iede nce pità la previjions dl tëmp tla rujeneda ladina.
La Rë zivica ie n purton per ruvé zentralmënter pra duta la nfurmazion che l'aministrazion publica, dantaprima la Provinzia y i chemuns pieta tres internet. La mendranza ladina ie massa pitla per vester reprejenteda te duta la repartizions dla Provinzia, dla cumuniteies raioneles y di chemuns. Purempò iel iust per na mendranza de rujeneda mpurtant vester prejënta sun i canai de nfurmazion prinzipei. Do plu mënsc de lëur possen sun l'adres www.provinzia.bz.it udëi la nfurmazion dal' aministrazion publica nce per ladin.
"Cun la Rë zivica vën l ladin tratà ala pèr cun l'autra rujenedes, y nëus ladins messon śën nce nuzé chël che nes vën pità te nosta rujeneda dl cuer" à dit Florian Mussner pra la prejentazion tl palaz Widmann a Bulsan. "La Rë zivica desmostra che un la rujeneda ladina ne ruven nia me nchin a Pruca o a Mantëna Todëscia, ma n ruva nce pra la nfurmazions de utl che vën dala Provinzia" à sorissà l assessëur ladin.
L servisc dla Provinzia che vën cun feter 30.000.000 vijites al ann nuzà l plu de duc, ie chël dl tëmp. Al'adres www.provinzia.bz.it/meteo-ladin possen per l prim iede tla storia giapé la previjions dl tëmp nce te nosta rujeneda dl'oma. Tlo iel sëuraprò da udëi de plu valores atuei che vën mandei ite da truepa stazions dal tëmp tla valedes, sun mont y ti raions da nëif. De chësta stazions ne n iel nce una te Sëlva, a San Martin de Tor, sun Piz La Ila y sun Piz Pisciadù. Tres webcams vëniel mustrà l cialé ora de plu raions, danter chisc nce l Jëuf de Frea y la Mont de Sëuc.
Tla rujeneda ladina ne vëniel nia pità defin duta la nutizies dala Provinzia y dai chemuns, ma na selezion de chëla nutizies che reverda de plu la populazion ladina. Nsci possen nce udëi l calënder dla manifestazions, dla fieres y di marcieies. La Rë zivica te trëi rujenedes spidla la situazion multietnica dl Südtirol. Tl reghister di ufizies y di culaburadëures ne possen nia me abiné i numeri de cuntat, ma n possa nce cialé do la denominazions ufizieles di departimënc, dla repartizions y di ufizies. Tla Rë zivica vëniel pità passa 900 servijes y passa 1.000 formuleres d'uni sort. Na bona pert ie nce da abiné tla rujeneda ladina.
L vantaje dla prejentazion digitela ie che la possa for inò unì adateda y cumededa. De chësc vieres ne ie la Rë zivica per ladin mo nia fineda defin, l ie plu che auter na "verscion beta", sciche de dì n proiet che possa mo unì svilupà inant aldò de coche l vën nuzà dala populazion.
Aldò de ultima statistiches ie la Rë zivica unida vijiteda 44 milion de iedesc ntan l ultimo ann. "La prejënza dla rujeneda ladina al medemo livel sciche l'autra rujenedes ie de gran valor per fé cunëscer nosta mendranza danter la populazion dl Südtirol" à dit l assessëur Florian Mussner. Nfati possa l 95,5% dla jënt dl Südtirol, che ne sà nia ladin, paredlé la plates dla Rë zivica y se rënder cont de nosta realtà ti luesc ladins. I idioms ladins vën adurvei do n prinzip de rotazion. La prejënza di ladins tla Rë zivica uel nce di mustré prufil ora dla valedes, à dit l diretëur dla repartizion nfurmatica Kurt Pöhl, fajan nce referimënt ai vijitadëures dla plata da ora dla Provinzia.
La Rë zivica che ie śën te duta trëi rujenedes provinzieles ie n proiet de gran prestige nce per i respunsabli dla sozietà de nfurmatica SIAG. "La plates ladines à sëuraprò na gran valuta de ntegrazion y identificazion dla jënt ladina" à sorissà l presidënt Eros Magnago.
"La mendranza vën tenida su dala rujeneda, perchël iel de gran valor che la vënie adurveda da pert dl'aministrazion publica a fé al savëi nfurmazions y dala jënt che tol su chësta nfurmazion" à dit Florian Mussner. I cuntenuc che vën tla gran rujenedes laurei su da truep culaburadëures, toma per la verscion ladina n majera pert sun l Ufize cuestions linguistiches cun si diretëura Anette Lenz: "chësc proiet ie n gran servisc ala rujeneda. L Ladin possa unì adurvà per duc i ciamps dla vita y nosc lëur dëssa judé pea acioche la rujeneda posse viver mo miec".
La Rë zivica per ladin ie unida realiseda te na culaburazion danter l Servisc de comunicazion, l Ufize cuestions linguistiches y dla sozietà de nfurmatica SIAG. L servisc meteo da unì dì vën repurtà tla rujeneda ladina da Ingrid Runggaldier, Isabella Ties y Ulrike Vittur.
Ciuldì che la à durà plu giut per la verscion ladina dla Rëi zivica iel unì speigà tla prejentazion a Bulsan. Tlo ne se tratela nia me de giaurì na porta ala nfurmazion dl'aministrazion, ie stat de bujën njenië banches dac nce tla rujeneda ladina y abiné soluzios a cuestions tecniches che per la gran rujenedes ie bele unides ressoltes al livel nternaziunel.
La plates inernet nueves
www.provinzia.bz.it
www.provinzia.bz.it/m/la (verscion per l telefonn)
www.provinzia.bz.it/meteo-ladin
Quick links
reghister di ufizies y dl telefonn: www.provinzia.bz.it/aprov-ladin
stazion dal tëmp Sëlva: www.provinzia.bz.it/meteo-ladin/mobile/akt_w.asp?stations_stid=703
stazion dal tëmp San Martin de Tor: www.provinzia.bz.it/meteo-ladin/mobile/akt_w.asp?stations_stid=961
stazion dal tëmp Piz Pisciadù: www.provinzia.bz.it/meteo-ladin/mobile/akt_h.asp?stations_stid=121
situazion dala nëif sun Piz La Ila: www.provinzia.bz.it/meteo-ladin/mobile/akt_l.asp?hyd_stat_id=120
De plu fotos sun la plata facebook "Jonta proviniziela"
as
Galaria dales fotografies
