Atualità
La Comisciun por la contrada azeta la strada a Badia
USP – La Comisciun provinziala por la contrada à azetè te süa sentada da chëst’edema le proiet menè ite dal Comun de Badia por slarié la strada cuntra Oies y fà n marciapîsc por garantì plü segurëza a chi che va a pé.
Le Comun de Badia ô realisé n marciapîsc dala “Villa Erica” ala dlijia da Oies. Le proiet vëiga danfora che al vëgnes fat sö n marciapîsc che pëia ia daite a San Linert y röia ćina pro la plaza da parchè dla dlijia dedicada a Sant Ojöp Freinademetz da Oies. Por ti garantì plü segurëza ales porsones che va a pé vëiga le Comun de Badia de gran ütl da lascè fà sö chëst’opera deache al passa cotan de jënt a pé, dantadöt pelegrins. Al vëgn odü danfora da slarié la strada a 5 metri sön n tòch de presciapüch 1890 m de lunghëza.
Le proiet à ciafè le bëgnstè dla Comisciun provinziala por la sconanza dla contrada a condiziun che al vëgnes indô ćiavè fora, olache al è, le fossè cuntra munt; al messarà gnì fat drenajes nöies cun fossà daverć. Por consolidé l’ërt da na pert dla strada ne podaràl nia gnì fat sö sciöche preodü mürs ziclopics, mo rampes da inverdì. Les rampes plü ërtes messarà gnì renforzades sentan ite na vegetaziun che va bun por chël post (brüsces da faü, seresc y manëstri). Les brüsces y i lëgns che vëgn eventualmënter tuć demez tratan che al vëgn fat i laûrs messarà indô gnì sentà ite.
usp
