Atualità
I sculeies ladins rejona pea
USP – Tla Cunsulta ladina di sculeies ti vëniel ai reprejentanc di sculeies dat la puscibltà de purté ite prupostes per miuré l servisc dla scoles y ntëur la scoles ti luesc ladins. Tla prima senteda dla cumposizion nueva ie Romeo Costa unì lità presidënt.
La Cunsulta ladina di sculeies ie cun sies reprejentanc di sculeies, y l cuordinadëur dla Ntendënza ladina, plutosc pitla, ma la à perchël l vantaje de pudëi vester plu efizienta. Da permò ie Romeo Costa dla Scoles autes per l’ert a Urtijëi unì lità presidënt. Esmeralda Dedej, dla medema scola, à giapà la crëta sciche vizepresidënta. Deberieda cun Romina Bernardi, Elvis Burchia, Silvia Bernardi y Elisabeth Hermi Prünster uniral tëut su y purtà inant la ideies, prupostes y dumandes da pert di sculeies. Nseniant de referimënt ie Lois Kastlunger, dl servisc per l’educazion sanitera tla Ntendënza ladina.
Tla senteda costituënta à l ntendënt Roland Verra spiegà ai reprejentanc di sculeies che i à la puscibltà de purté ite prupostes per l bën di sculeies che reverda truep ciamps. L ie tlo unì fat l ejëmpl de dla matura tla scoles ladines, dla strutures cun nce la mensa, i programs de scola, la valutazions, i orars, i credic furmatives ma nce dut l sistem scolastich ladin.
Tl program dla Cunsulta ladina di sculeies iel udù dant la culaburazion per l ajënda “Dai” y n generel cun la cunsultes dl’autra doi grupes de rujeneda. Per chësc ann se an nce tëut dant de fé n logo, de tenì cuntat cun la Cunsulta di genitores, mëter a jì l “Artday” y de dé la puscibltà de furmazion per i portausc de tlas.
La Cunsulta ladina di sculeies se ancunterà mo dan Nadel per la proscima senteda.
Cunsulta ladina di sculeies 2012/13
Romeo Costa, Scoles autes per l’ert Cademia (presidënt)
Esmeralda Dedej, Istitut tecnich economich Raetia (vizepresidënta)
Romina Bernardi, Scoles autes La Ila
Elvis Burchia, Scoles autes La Ila
Silvia Bernardi, Istitut tecnich economich Raetia
Elisabeth Hermi Prünster, Scoles autes per l’ert Cademia
as
