Atualità

Ambiënt | 10.12.2012 | 14:44

L furnel dal refudam ai chemuns

USP - Davia che la gestion dl refudam ie de cumpetënza di chemuns dëssa l furnel dal refudam nuef de Bulsan unì vendù ai chemuns. La Jonta provinziela à te si senteda (da NCUEI) ai 10 de dezëmber valuta la pusciblteies a na maniera che la tarifes ne auze nia ora de mesura.

Aldò dla proietazions prejentedes dal assessëur Florian Mussner dëssa l furnel dal refudam nuef a Bulsan unì a custé 143 milion de euro. Te chësta soma iel nce i 20 milion che la Provinzia à bele dat ora per l grunt, i lëures per l anjenië ca l grunt y la proietazions. "La pert de 123 milion che resta mo dëssa unì venduda ai chemuns che pudëssa pona dé inant la gestion ala sozietà ECO Center" à dit l presidënt dla Provinzia riesc do la senteda. L ECO Center ie per 45% dl Chemun de Bulsan, per 45% di autri chemuns y per l 10% dla Provinzia. Te chëla che la Provinzia zapëssa ora, restëssa la sozietà defin tla mans di chemuns y pudëssa nsci sëurantò l mplant a Bulsan Sud.

L credit de 123 milion per l furnel dal refudam ie unì tëut su per 15 ani y uni an iel da paië ju 13 milion de euro. I assessëures provinziei à te si senteda nce pensà danora co che l custimënt pudëssa unì paià ju dai chemuns. Luis Durnwalder à te cunferënza stampa purtà dant trëi seves de finanziamënt: la tarifes, l vënder dl'ciaut che vën ora dl furnel y n mprëst tres l fondi de rotazion.

A na maniera che l ECO Center posse giapé scioldi mprestei dal fond de rotazion à la Jonta provinziela dat pro na pruposta de lege aldò. "La soluzion de scioldi dal fond de rotazion per i prim ani schivëssa n auzé massa debota dla tarifes dal refudam" à spiegà l presidënt dla Provinzia.