Atualità
Sozieteies provinzieles urganisedes da nuef: manco custimënt y plu efiziënza
USP – La Provinzia fova n iede te feter 20 sozieteies ersternes. Da velch iela bele zapeda ora y co fé cun chëles che resta mo, à la Jonta provinziela tratà te si senteda (da NCUEI) ai 10 de dezëmber. Aldò de Durnwalder uniral proscimamënter dessegur mudazions per smendrì l custimënt y miuré l’efiziënza.
Sparanië custimënt y dal'autra pert miuré la funzionalità ie i doi prinzipies dla Jonta provinziela tla cuestion de smendrì la partezipazion ala sozieteies esternes. "De vel sozieteies sons bele zapei ora, d'autres ulessan mëter adum per les coordiné miec, per sparanië cunselieres d'aministrazion y personal" à dit l presidënt dla Provinzia riesc do la senteda dla Jonta te chëla che i assessëures à valutà i pro y contra.
De cater sozieteies ie la Provinzia bele zapeda ora: dla sozietà de finanziamënt dl tunel dl Prëner y dla stazion dal daz dl'autostreda Sadobre iela zapeda ora. Dla Brennercom ala vendù 25% de partezipazion y l hotel dla Terme Maran ala vendù defin. Śën se tratela sce vënder nce la partezipazions dla sozieteies Interbrennero (10,56%), dla Mercato Generale de Bulsan (10%) y i 42,4% dla Brennercom che ie mo dla Provinzia. N cont dla partezipazion ala Mediocredito (17,49%) uelen, aldò de Luis Durnwalder, abiné na soluzion deberieda cun la Provinzia de Trënt.
Sun mëisa dla Jonta provinziela iel nce de mëter adum de plu sozieteies. Te cunferënza stampa à l presidënt dla Provinzia rujenà de fé ora dl'Università, la Fundazion dl università y la Claudiana na sëula sozietà. Tlo pudëssa n cajo nce unì tëut ite l zënter de inuvazion TIS. N'autra idea fossa chëla de junté l TIS pra l ciamp plu economich cun na sozietà metuda adum dala Business Location Südtirol (BLS) y la sozietà de marketing turistich SMG. Leprò ruvëssa mo la sozietà de espurtazion EOS, me che chësta, nce sce finanzieda n bona pert dala Provinzia, ie dla Camera de Cumerz y perchël mesëssa chësta vester a una. L presidënt dla Provinzia à purtà dant l'idea de autra trëi majera fujions, metan adum la Terme y la gestion dla Terme de Maran, la sozieteies per la strutures de trasport (STA) y la gestion di trasporc (SBA) y mplu mo l zënter Laimburg cun l Demanio Forestale.
Cun l zapé ora de plu sozieteies, ti vën la Jonta provinziela do a na diretiva dl Guviern Talian per l'aministrazions publiches.
as
Galaria dales fotografies
Landeshauptmann Durnwalder zur Neuordnung der Landesgesellschaften
- Scarica il file audio 639 kb
